ശത്രുക്കളുടെ വാസസ്ഥാനത്ത് അങ്ങോട്ട്ചെന്നാക്രമിച്ച് വധിക്കുക എന്നത് ഒരു യുദ്ധ തന്ത്രമാണ്. കാമമാണ് ബലവാനായ ശത്രുവെന്ന് ഭഗവാന് മുമ്പ് പറഞ്ഞു. ആ ശത്രു എവിടെയാണ് താമസിക്കുന്നത്. മൂന്ന് സ്ഥലങ്ങളിലായി താമസിക്കുന്നു.
ഒന്ന് -കണ്ണ്, ചെവി, മൂക്ക്, നാക്ക്, തൊലി, എന്ന ജ്ഞാനേന്ദ്രിയങ്ങളും വാക്ക്, കൈ, കാല്, ഉപസ്ഥം എന്ന കര്മ്മേന്ദ്രിയങ്ങളും.
രണ്ട്- സങ്കല്പ്പിക്കുകയും ഉടന് മറിച്ച് സങ്കല്പ്പിക്കുകയും ചെയ്യുന്ന മനസ്.
മൂന്ന്- അന്തിമതീരുമാനം എടുക്കുന്ന ബുദ്ധി.
കാമം ഈ മൂന്ന് കേന്ദ്രങ്ങളില് ഇരുന്നുകൊണ്ട് ജീവാത്മാവിന്റെ അല്പമായ ജ്ഞാനത്തെ ഒളിച്ചുവെയ്ക്കുന്നു. ഇന്ദ്രിയങ്ങള് വഴിയാണ് ഭൗതിക സുഖങ്ങളെപറ്റി കേള്ക്കുകയും, കാണുകയും ചെയ്ത് കാമം-തന്റെ യുദ്ധം തുടങ്ങുന്നത് അതുകൊണ്ട് ഇന്ദ്രിയങ്ങളെ ആദ്യത്തെ താവളമായി പറയുന്നു.
മനസുകൊണ്ട് ആ സുഖം വേണമോ വേണ്ടയോ എന്ന് ചിന്തിക്കുന്നു.
ഇത് രണ്ടാമത്തെ താവളം ബുദ്ധികൊണ്ട് ഭൗതിക സുഖം കൂടിയേ കഴിയൂ. എന്ന് തീരുമാനിക്കുന്നു.
ഇത് മൂന്നാമത്തെ താവളം. ഈ മൂന്നുതാവളങ്ങളില് നിലയുറപ്പിച്ചുകൊണ്ട് ദേഹം സ്വീകരിച്ച ജീവാത്മാവിനെ, പരമാത്മാവായ ശ്രീകൃഷ്ണ ഭഗവാനെ പറ്റിയും ഭാഗവതതത്ത്വത്തെ പറ്റിയും ഭക്തന്മാരെ പറ്റിയും ചിന്തിക്കാന് പോലും സമ്മതിക്കാതെ, ഭൗതികസുഖങ്ങളായ ദേഹസുഖം, ഭാര്യാപുത്രാദികള്, ബന്ധുക്കള് ധനം മുതലായ വിവിധ വസ്തുക്കളിലേയ്ക്ക് വലിച്ചുകൊണ്ട്പോകുന്നു.
