കോട്ടയം: നവീകരിച്ച എംസി റോഡിലെ മാന്ഹോളുകള് യാത്രക്കാര്ക്ക് ഭീഷണിയാകുന്നു. കെഎസ്ടിപി നിര്മ്മിച്ച താരതമ്യേന ഗുണനിലവാരമുള്ള റോഡിന്റെ മദ്ധ്യത്തില് തലയുയര്ത്തി നില്ക്കുന്ന വിവിധ വകുപ്പുകളുടെ മാന്ഹോളുകളാണ് അപകടഭീതി ഉയര്ത്തുന്നത്.
റോഡിന്റെ ടാര്നിരപ്പില്നിന്നും വളരെ ഉയര്ന്നുനില്ക്കുന്ന ഈ മാന്ഹോളുകളില് കയറി വാഹനങ്ങളുടെ നിയന്ത്രണം നഷ്ടപ്പെടുന്നതാണ് അപകടത്തിന് ഇടയാക്കുന്നത്. വളരെ വേഗത്തിലെത്തുന്ന വാഹനങ്ങളുടെ ഡ്രൈവറന്മാര് മാന്ഹോളുകള്ക്ക് സമീപത്തെത്തുമ്പോള് വാഹനം പെട്ടെന്ന് വെട്ടിച്ചുമാറ്റുന്നതും മറ്റ് വാഹനങ്ങളുമായി കൂട്ടിയിടിക്കാന് വഴിയൊരുക്കുന്നുണ്ട്.
ചവിട്ടുവരി കവല മുതല് കോട്ടയം നഗരം വരെയുള്ള മൂന്ന് കിലോമീറ്ററിനുള്ളില് 15 മാന്ഹോളുകളുകളാണ് വാഹനങ്ങള്ക്ക് കെണിയൊരുക്കുന്നത്. ബിഎസ്എന്എല്ലിന്റെ വകയാണ് ഇതില് ഭൂരിഭാഗം മാന്ഹോളുകളും. ടെലിഫോണ് കേബിള് കടന്നുപോകുന്ന വഴികളില് ബിഎസ്എന്എല് സ്ഥാപിച്ചിട്ടുള്ള സെല്ലാറിലേക്കുള്ളതാണ് ഈ മാന്ഹോളുകള്. പണ്ട് മുതലേ ഇവിടെ റോഡില് മാന്ഹോളുകള് ഉണ്ടായിരുന്നു. എന്നാല് നവീകരണം നടന്നു കഴിഞ്ഞപ്പോള് മാന്ഹോളുകള്ക്ക് ഒപ്പം റോഡിന് ഇയരമില്ലാതെ പോയതാണ് അപകടത്തിന് കാരണമാകുന്നത്. ചില സ്ഥലങ്ങളില് റോഡും മാന്ഹോളുകളുമായി അരയടിയോളം ഉയരമുണ്ട്. റോഡിനേക്കാളും ഉയരത്തില് മാന്ഹോളുകള് പണിതിരിക്കുന്നതിനാല് ഇത് ശ്രദ്ധിക്കാതെ വരുന്ന ഇരുചക്ര വാഹനയാത്രികരാണ് ഇവിടെ കൂടുതലും അപകടത്തില് പെടുന്നത്.
മഴക്കാലംകൂടി ആയതോടെ അപകടങ്ങള് വലിയതോതില് ഉയര്ന്നിട്ടുണ്ട്. മാന്ഹോളുകള് പെട്ടെന്നു ശ്രദ്ധിക്കാന് സാധിക്കാത്തതിനാല് രാത്രി സമയത്താണ് കൂടുതലും അപകടങ്ങള് സംഭവിക്കുന്നത്. ഈ പ്രശ്നം ബന്ധപ്പെട്ട അധികാരികളെ അറിയിച്ചെങ്കിലും അപകടങ്ങള് വര്ദ്ധിക്കുന്നതല്ലാതെ കാര്യക്ഷമമായ ഒരു നടപടിയും നിരത്തില് കാണാന് കഴിയുന്നില്ലെന്നാണ് പരാതി. ഇക്കാര്യം വീണ്ടും അധികൃതരെ അറിയിക്കുമ്പോള് മുടന്തന് ന്യായങ്ങള് പറഞ്ഞു വകുപ്പുകള് പരസ്പരം പഴിചാരുകയല്ലാതെ മാന്ഹോളുകള് റോഡ് നിരപ്പിനൊപ്പമാക്കാന് ഒരു ശ്രമവും നടക്കുന്നില്ല.
റോഡിലെ മാന്ഹോളുകളുടെ കാര്യത്തില് അടിയന്തിര ശ്രദ്ധ പതിപ്പിച്ചാല് മാത്രമേ വര്ദ്ധിച്ചുവരുന്ന അപകടങ്ങള്ക്ക് അറുതി വരുത്തുവാന് കഴിയു. റോഡ് നിരപ്പില് നിന്നും ഉയര്ന്നു നില്ക്കുന്ന മാന്ഹോളുകളുടെ ഇരുമ്പ് അടപ്പുകള് റോഡ് ലവലില് സ്ഥാപിച്ച് അപകടങ്ങള് ഒഴിവാക്കുവാന് അധികൃതര് തയാറാവണ മെന്നാണ് നാട്ടുകാരുടെ ആവശ്യം.
