പന്തളം: വാടകയ്‌ക്കെടുത്ത വാഹനം പണയം വെച്ച് തട്ടിപ്പ് നടത്തിയ രണ്ട് പേരെ പന്തളം പോലീസ് അറസ്റ്റ് ചെയ്തു.
പന്തളം കടയ്‌ക്കാട് ആനന്ദഭവനില്‍ അഖില്‍മോഹന്‍(22), വലിയവിളകിഴക്കേതില്‍ അപ്പു എന്നു വിളിക്കുന്ന സജു(23) എന്നിവരാണ് അറസ്റ്റിലായത്. ഈക്കേസില്‍ കായംകുളം സ്വദേശി കൊച്ചുമോന്‍ എന്നു വിളിക്കുന്ന നൗഷാദിനെ പിടികിട്ടാനുണ്ട്. മങ്ങാരം കുന്നിക്കുഴി അനീഷ്ഭവനില്‍ ബിനുവിന്റെ പരാതിയുടെ അടിസ്ഥാനത്തിലാണ് പോലീസ് കേസ് എടുത്തത്. ബിനുവിന്റെ സിഫ്റ്റ് കാറ് ഏപ്രില്‍ നാലിന് പ്രതികള്‍ 20 ദിവസത്തേക്ക് വാടകയ്‌ക്ക് എടുത്തിരുന്നു. എന്നാല്‍ കാലാവധി കഴിഞ്ഞിട്ടും വാഹനം മടക്കിക്കിട്ടാഞ്ഞപ്പോഴാണ് ഈ മാസം 9ന് ബിനു അടൂര്‍ ഡിവൈഎസ്പിക്ക് പരാതി നല്‍കി. പോലീസ് നടത്തിയ അന്വേഷണത്തില്‍ വാടകയ്‌ക്കെടുത്ത് വാഹനം കായംകുളം സ്വദേശിയായ നൗഷാദിന് കൈമാറുകയും നൗഷാദ് കാറ് പണയം വയ്‌ക്കുകയും ചെയ്തതായി മനസ്സിലായത്.കാറ് കൊല്ലത്തു നിന്നും പോലീസ് കണ്ടെടുത്തു. ഇത്തരത്തില്‍ അഞ്ചോളം കാറുകള്‍ പ്രതികള്‍ വാടകയ്‌ക്കെടുക്കുകയും പണയം വയ്‌ക്കുകയും ചെയ്തിട്ടുണ്ട്. എന്നാല്‍ ഈ കാറുകളുടെ താക്കോല്‍ നഷ്ടപ്പെട്ടന്ന് പറഞ്ഞ് ഉടമകളില്‍ നിന്ന് ഡൂപ്ലിക്കേറ്റ് താക്കോല്‍ വാങ്ങുകയും ഈ താക്കോല്‍ ഉപയോഗിച്ച് പണയം വെച്ചിടത്തു നിന്ന് കാര്‍ മോഷ്ടിച്ച് ഉടമകള്‍ക്ക് മടക്കി നല്‍കിയും തട്ടിപ്പ് നടത്തി വന്നതായി പോലീസ് പറഞ്ഞു. പഴകുളം സ്വദേശി ഹക്കിംഷായുടെ ഇന്നോവാ കാര്‍ വാടകയ്‌ക്കെടുക്ക് പണയം വെച്ച് തട്ടിപ്പ് നടത്തിയകേസില്‍ അടൂര്‍ പോലീസിലും ഇവര്‍ക്കെതിരെ കേസുണ്ട്. രണ്ടാം പ്രതി സജു ഏഴോളം മറ്റ് കേസുകളിലും പ്രതിയാണ്.
പ്രതികരിക്കാൻ ഇവിടെ എഴുതുക: