വടകര: സുരക്ഷാ മതില് തകര്ന്ന് വീണതോടെ അപകടഭീഷണി നേരിടുന്ന വടകര സബ്ജയിലില് നിന്നും 20 തടവുകാരെ കണ്ണൂര് സെന്ട്രല് ജയിലിലേക്ക് മാറ്റി.
ജയില് വകുപ്പ് ഉത്തരമേഖലാ ഡിഐജി കെ. ശിവദാസ് തൈപ്പറമ്പിലിന്റെ ഉത്തരവ് പ്രകാരമാണ് ഇന്നലെ ഉച്ചയോടെ തടവുകാരെ മാറ്റിയത്. 13 തടവുകാരെ മാത്രം പാര്പ്പിക്കാന് സൗകര്യമുള്ള വടകര സബ് ജയിലില് 38 തടവുകാരാണ് ഉണ്ടായിരുന്നത്. വ്യാഴാഴ്ച രാത്രിയാണ് സബ്ജയിലിന്റെ മതില് തകര്ന്നത്. ജയിലിന്റെ പടിഞ്ഞാറു ഭാഗത്തുള്ള ഏഴ് മീറ്റര് നീളത്തിലുള്ള മതിലാണ് തകര്ന്നത്. ബാക്കിയുള്ള എട്ട് മീറ്റര് നീളമുള്ള മതിലും അപകടഭീഷണിയിലാണ്. ജയിലിന് സമീപത്തെ വീടുകള്ക്ക് മതില് ഭീഷണിയായതോടെ ജനരോഷം ഉയര്ന്നിരിക്കുകയാണ്. തുടര്ന്ന് മതില് പുനര് നിര്മ്മിക്കാന് ജയില് വകുപ്പ് തീരുമാനിച്ചു.
