കൊല്ലം: സ്കൂള് കെട്ടിടത്തിന്റെ തൂണ് വീണു മരിച്ച മുഖത്തല ഗ്രാമോദയ ട്രസ്റ്റ് സ്കൂളിലെ എട്ടാംക്ലാസ് വിദ്യാര്ത്ഥി നിഷാന്തിന്റെ കുടുംബത്തെ കൈ ഒഴിഞ്ഞ് സംസ്ഥാനസര്ക്കാര്. നിഷാന്തിന്റെ കുടുംബത്തിന് യാതൊരുവിധ ധനസഹായവും സര്ക്കാര് ഇതുവരെയും നല്കിയിട്ടില്ല.
ഒരുലക്ഷം രൂപ ധനസഹായം സര്ക്കാര് പ്രഖ്യാപിച്ചുവെന്നത് മാധ്യമങ്ങളിലൂടെ മാത്രമാണ് വീട്ടുകാര് അറിഞ്ഞത്. മരണശേഷം നടന്ന മന്ത്രിസഭാ യോഗത്തില് പോലും ഇക്കാര്യം സ്ഥലം എംഎല്എയും മന്ത്രിയുമായ ജെ.മേഴ്സിക്കുട്ടിഅമ്മയെ പോലും ധരിപ്പിച്ചിട്ടില്ല എന്ന ആരോപണവും ശക്തമാണ്. സ്കൂള് തുറപ്പ് ദിവസമാണ് നിഷാന്തിന് മരണം സംഭവിച്ചത്. സ്കൂളിന്റെ തെക്കുവശത്തുള്ള കെട്ടിടത്തിന്റെ തൂണാണ് അപകടത്തിന് കാരണമായത്. ക്ലാസില് നിന്നും ഇതിന് സമീപമുള്ള പൈപ്പില് കൈകഴുകാനെത്തിയപ്പോഴായിരുന്നു അപകടം. അപടത്തിനിരയായ കെട്ടിടത്തിന് ഫിറ്റ്നസില്ലായിരുന്നു. കഴിഞ്ഞ വര്ഷത്തെ ഫിറ്റ്നസ് അനുമതിയിലാണ് കെട്ടിടം പ്രവര്ത്തിച്ചിരുന്നത്. 1968ല് സ്കൂള് ആരംഭിച്ച സമയത്ത് പണികഴിപ്പിച്ച കെട്ടിടം ഇതുവരെയും പുതുക്കിനിര്മിച്ചിട്ടില്ല.
വിദ്യാഭ്യാസ വകുപ്പിന്റെ വീഴ്ചയായിരുന്നു നിഷാന്തിന്റെ മരണം. സിപിഐയുടെ അധീനതയിലുള്ള സ്കൂള് മനേജ്മെന്റിനെ സംരക്ഷിക്കുവാന് അന്ന് മുതല്ക്കെ തന്നെ ശ്രമമുണ്ടായിരുന്നു. വിദ്യാഭ്യാസ ഡപ്യൂട്ടി ഡയറക്ടറടക്കം സ്കൂള് മാനേജ്മെന്റിന്റെ സംരക്ഷിക്കുന്ന നിലപാടായിരുന്നു സ്വീകരിച്ചത്.
