കല്പ്പറ്റ: വയനാട് ആര്ച്ചറി അക്കാദമിയിലെ വിദ്യാര്ത്ഥികളുടെ പഠനം ആശങ്കയില്. നിര്മ്മാണം കഴിഞ്ഞ ഹോസ്റ്റല് കെട്ടിടം തുറക്കാത്തതും ആണ്കുട്ടികള്ക്ക് താമസിക്കാനുള്ള സൗകര്യമൊരുക്കാത്തതുമാണ് ഹൈസ്കൂള്, പ്ലസ്ടു, ഡിഗ്രി ക്ലാസ്സുകളിലായി പഠിക്കുന്ന കായികതാരങ്ങളുടെ പഠനത്തിന് തടസം. കണ്ണൂര്, കോഴിക്കോട്, മലപ്പുറം, ഇടുക്കി, എറണാകുളം, വയനാട് തുടങ്ങിയ ജില്ലകളില്നിന്നായി മുപ്പതിലധികം കുട്ടികളാണ് സ്പോര്ട്സ് കൗണ്സിലിനു കീഴില് പുല്പ്പള്ളിയിയിലെ ആര്ച്ചറി അക്കാദമിയില് പഠിക്കുന്നത്.
സംസ്ഥാന-ദേശീയ മത്സരങ്ങളില് കഴിവുതെളിയിച്ചവരാണ് പലരും. അയല് ജില്ലകളിലെ ചില വിദ്യാര്ത്ഥികള് വയനാട്ടില്തന്നെയുള്ള കൂട്ടുകാരുടെ വീടുകളില് താത്കാലികമായി താമസിച്ചാണ് പുല്പ്പള്ളിയിലെത്തുന്നത്. മറ്റ് വിദ്യാര്ത്ഥികള് താമസസൗകര്യം ഒരുങ്ങുന്നതുംകാത്ത് വീടുകളില്തന്നെ. അയല്ജില്ലകളില്നിന്നും ദിവസേന വന്നുപഠിക്കാന് ശ്രമിക്കുന്ന വിദ്യാര്ത്ഥികളുമുണ്ട്.
പക്ഷെ, പണവും സമയവും തടസം.
ഏഴ് വര്ഷമായി വാടകക്കെട്ടിടത്തിലാണ് ഹോസ്റ്റല്. എന്നാല്, കഴിഞ്ഞ മെയ് 31 ന് മുന്പായി കെട്ടിടം ഒഴിഞ്ഞുതരണമെന്ന് ഉടമസ്ഥന് ആവശ്യപ്പെട്ടു. ഇതിനായി ആറ് മാസം സമയം ലഭിച്ചിട്ടും സ്പോര്ട്സ് കൗണ്സില് തയാറാകാത്തതാണ് പ്രശ്നങ്ങള്ക്കു കാരണം. ഹോസ്റ്റല് കെട്ടിട നിര്മാണം പൂര്ത്തീകരിച്ചെങ്കിലും വൈദ്യുതി ലഭിച്ചിട്ടില്ല. പഞ്ചായത്ത് അധികൃതര് ഇടപെട്ട് വൈദ്യുതി, വെള്ളം തുടങ്ങിയ പ്രശ്നങ്ങള് പരിഹരിച്ചാലും ആണ്കുട്ടികള്ക്കുള്ള താമസസൗകര്യം വേറെ കാണണം.
