കോഴിക്കോട്: തൊണ്ടയാട് – രാമനാട്ടുകര ദേശീയപാതയില് ഗ്യാസ്ടാങ്കര് ലോറി പാലുമായി വന്ന ലോറിയില് കൂട്ടിയിടിച്ചുണ്ടായ അപകടത്തില് ഒരാള് മരിച്ചു. അമൃത് മില്ക്ക് ലോറിഡ്രൈവര് ചേര്ത്തല പാണാവള്ളി സ്വദേശി കൃഷ്ണചന്ദ്രന് എന്ന മനു (28) ആണ് മരിച്ചത്. രണ്ട് പേര്ക്കു ഗുരുതരമായി പരുക്കേറ്റു . പാല്വണ്ടിയിലുണ്ടായിരുന്ന സെയില്സ്മാന് രവി, ഗ്യാസ് ടാങ്കറിലെ ഡ്രൈവര് ഹരീഷ് എന്നിവര്ക്കാണ് പരിക്കേറ്റത്. ഇവര് കോഴിക്കോട് മെഡിക്കല്കോളജ് ആശുപത്രിയില് ചികിത്സയിലാണ്. കഴിഞ്ഞ ദിവസം പുലര്ച്ചെ 12.30 ഓടെ പാലാഴി ഹൈലൈറ്റ് മാളിനു സമീപത്താണ് സംഭവം. പന്തീരാങ്കാവിലെ അമൃത് മില്ക്ക് പ്ലാന്റില് നിന്നു വയനാട്ടിലേക്കു പാലുമായി പോവുകയായിരുന്ന ലോറിയില് തൊണ്ടയാട് ഭാഗത്തുനിന്നു വന്ന ഗ്യാസ് ടാങ്കര് ഇടിക്കുകയായിരുന്നു. ഇടിയുടെ ആഘാതത്തില് പാല്വണ്ടിയുടെ മുന്ഭാഗം പൂര്ണമായും തകര്ന്നു. നിയന്ത്രണം വിട്ട ടാങ്കര് ലോറി റോഡിന്റെ കിഴക്കുഭാഗത്തെ വയലിലേക്കിറങ്ങി നിന്നു. അപകടത്തെ തുടര്ന്ന് ബൈപ്പാസില് മണിക്കൂറുകളോളം ഗതാഗതം സ്തംഭിച്ചു. ഇന്നലെ ഉച്ചയ്ക്ക് 12 ഓടെയാണ് ബൈപ്പാസ് വഴിയുള്ള ഗതാഗതം പുന:സ്ഥാപിച്ചത്.
തൊണ്ടയാട് രാമനാട്ടുകാര ദേശീയപാതയില് അപകടം നിത്യസംഭവമാണ്. അതേസമയം പാചകവാതകവുമായെത്തിയ ടാങ്കര് അപകടത്തില്പ്പെട്ടതു ജനത്തെ ഭീതിയിലാഴ്ത്തി. ടാങ്കര് ലോറിയാണ് അപകടത്തില്പ്പെട്ടതെന്നറിഞ്ഞയുടന് സമീപവാസികളില് ചിലര് ഇവിടെ നിന്നു മാറിയിരുന്നു. പുലര്ച്ചെ ക്രെയില് ഉപയോഗിച്ചാണ് പാല്വണ്ടി ഒരു വശത്തേക്ക് മാറ്റിയത്. അഗ്നിശമന സേനയെത്തി റോഡ് കഴുകി വൃത്തിയാക്കിയശേഷമാണ് ഇതുവഴിയുള്ള ഗതാഗതം പുന:സ്ഥാപിച്ചത്.
