തക്കാളിക്കും പച്ചമുളകിനും തീവില സ്വന്തം ലേഖകന്‍

കോഴിക്കോട്: പച്ചക്കറിക്ക് തീവില. തക്കാളിക്കും പച്ചമുളകിനുമാണ് വന്‍ വിലക്കയറ്റം. തക്കാളിക്ക് കിലോവിന് 70 മുതല്‍ മുകളിലോട്ടാണ്. പച്ചമുളകിന് കിലോക്ക് 100 മുതല്‍ 120 രൂപ വരെ എത്തി. ഉരുളക്കിഴങ്ങിന് 25 ഉം ഉള്ളിക്ക് 15 ഉം, മുരിങ്ങാക്കായ 40, കാരറ്റ്, ബീറ്റ്‌റൂട്ട് 30 വീതം, കൊത്തവരയ്‌ക്ക് 40 ഉം, കോളിഫ്‌ളവര്‍ 30 എന്നിങ്ങനെയുമാണ് വില. സംസ്ഥാനത്തിന് പുറത്തു നിന്നും വരുന്ന പച്ചക്കറി ഇനങ്ങള്‍ക്ക് വിലയേറ്റപ്പെട്ട്തുപോലെതന്നെ, സംസ്ഥാനത്തിന്റെ മറ്റു ഭാഗങ്ങളില്‍ നിന്നും വരുന്ന പച്ചക്കറിയിനങ്ങള്‍ക്കും വില വര്‍ദ്ധനവുണ്ട്. പയര്‍, കുമ്പളങ്ങ, വെളളരിക്ക തുടങ്ങിയവയ്‌ക്കാണ് വില വര്‍ദ്ധനവുള്ളത്. വെള്ളമില്ലാത്തതിനാല്‍ അന്യ സംസ്ഥാനത്ത് പച്ചക്കറികൃഷി, നശിച്ചുകൊണ്ടിരിക്കുയാണെന്നാണ് പച്ചക്കറി വ്യാപാരികള്‍ പറയുന്നത്. അതുകൊണ്ടുതന്നെ പച്ചക്കറി വരവ് കാര്യമായി കുറഞ്ഞിട്ടുണ്ടെന്നും അവര്‍ പറയുന്നു. എന്നാല്‍ വരള്‍ച്ചയുടെയും മറ്റും പേര് പറഞ്ഞ് പച്ചക്കറിയിനങ്ങള്‍ക്ക് അന്യായമായ വില ഈടാക്കുകയാണെന്നാണ് ഉപഭോക്താക്കള്‍ പറയുന്നത്. നാടാകെ നിയമസഭാ തെരഞ്ഞെടുപ്പിന്റെ ചൂടിലാകുകയും ഭരണ സംവിധാനം പാടെ നിഷ്‌ക്രിയമായതുമാണ് ബോധപൂര്‍വമുള്ള വിലക്കയറ്റത്തിന് പിന്നിലെന്നും ഉപഭോക്താക്കള്‍ കുറ്റപ്പെടുത്തുന്നുണ്ട്. പച്ചക്കറി വില നിയന്ത്രിക്കുന്നതിനാവശ്യമായ സത്വര നടപടി സ്വീകരിക്കണമെന്നും ഉപഭോക്താക്കള്‍ അധികൃതരോടാവശ്യപ്പെട്ടു.