കൊട്ടാരക്കര: കൊട്ടാരക്കര മണ്ഡലത്തില് എന്ഡിഎ കളം നിറഞ്ഞ് കഴിഞ്ഞു. മണ്ഡലം നിലനിര്ത്താനും ഹാട്രിക് തികയ്ക്കാനും പോരാടുന്ന അയിഷപോറ്റിയും എന്ഡിഎയുടെ രാജേശ്വരിരാജേന്ദ്രനും തമ്മിലാണ് പ്രധാന മത്സരം. കോണ്ഗ്രസിലെ സവിന്സത്യന് പോരാട്ടരംഗത്ത് സജീവമാണങ്കിലും കൂറുമാറ്റം പ്രകടമാണ്. പലയിടത്തും എല്ഡിഎഫ് ചേരിയിലേക്കാണ് കോണ്ഗ്രസിലെ ഒരു വിഭാഗം വോട്ട് മറിക്കാന് ശ്രമങ്ങള് നടത്തുന്നത്.
എന്ഡിഎയുടെ മുന്നേറ്റം ഇരുമുന്നണികളെയും ഒരുപോലെ അമ്പരിപ്പിച്ച് കഴിഞ്ഞു. ഭൂരിപക്ഷം എത്രയെന്ന് മാത്രം അറിഞ്ഞാല് മതി എന്ന് പ്രഖ്യാപിച്ച് തെരഞ്ഞെടുപ്പ് രംഗത്ത് ഏറെ മുന്നേറിയിരുന്ന എല്ഡിഎഫ് അവസാന ലാപ്പില് ഭീതിയിലാണ്. എല്ലാ ബൂത്തിലും കൂടുതല് ജാഗ്രത പുലര്ത്താനും കോണ്ഗ്രസിന്റെ ഇടഞ്ഞ് നില്ക്കുന്ന വിഭാഗത്തിന്റെ വോട്ട് പരമാവധി സമാഹരിക്കാനും അണികള്ക്ക് നിര്ദ്ദേശം നല്കി കഴിഞ്ഞു. മാത്രമല്ല സ്ക്വാഡ് പ്രവര്ത്തനം ഊര്ജ്ജിതമാക്കിയും ന്യൂനപക്ഷങ്ങളില് ബിജെപി വരുന്നു എന്ന ഭീതിപരത്തിയും വോട്ടുകള് സമാഹരിക്കാനാണ് കര്ശനമായ നിര്ദ്ദേശം നല്കിയിരിക്കുന്നത്. മാത്രമല്ല സിപിഎമ്മുമായി ബന്ധമുള്ള എല്ലാ സംഘടനകളോടും പരസ്യമായും രഹസ്യമായും വോട്ടുകള് ഉറപ്പിക്കാനും ആവശ്യപ്പെട്ടിട്ടുണ്ട്.
എന്ഡിഎ സ്ഥാനാര്ത്ഥിക്ക് വിവിധ പഞ്ചായത്തുകളില് ലഭിച്ച ബഹുജനസ്വീകരണമാണ് ഇടതുപാളയത്തെ അങ്കലാപ്പിലാക്കിയത്. പ്രത്യേകിച്ച് കോളനികളിലും സ്ത്രീജനങ്ങളില് നിന്നും ലഭിക്കുന്ന പിന്തുണയാണ് തങ്ങളുടെ പരമ്പാരഗത വോട്ടുകള് ഇളകി എന്ന തിരിച്ചറിവിലേക്ക് പാര്ട്ടിയെ എത്തിച്ചത്. ഇതിനെ മറികടക്കാന് സ്ഥാനാര്ത്ഥി നിര്ണയപ്രശ്നത്തില് ഉടക്കി നില്ക്കുന്ന കൊടിക്കുന്നിലുമായി രഹസ്യചര്ച്ചകള് വരെ നേതാക്കള് നടത്തിയതായി സൂചനയുണ്ട്. കൊടിക്കുന്നില് വിഭാഗത്തിന് മുന്തൂക്കമുള്ള പ്രദേശങ്ങളില് കോണ്ഗ്രസിന്റെ സ്ക്വാഡ് പ്രവര്ത്തനം നിര്ജീവമാണന്നത് ഇതിന്റെ ഭാഗമാണന്നും ആക്ഷേപമുണ്ട്. കോണ്ഗ്രസില് നിന്ന് സിപിഎമ്മില് എത്തിയ ചില നേതാക്കളാണ് ഇതിന് പിന്നില് പ്രവര്ത്തിക്കുന്നത്. പകരം പാര്ലമെന്റ് തെരഞ്ഞെടുപ്പിലും ചടയമംഗലത്തും തിരിച്ചുസഹായിക്കാമെന്നാണ് ധാരണ.
ഒരു കാരണവശാലും ബിജെപി മേല്ക്കൈ നേടുന്ന നിലയിലേക്ക് കാര്യങ്ങള് പോകരുതെന്നാണ് രണ്ട് പാര്ട്ടികളുടേയും നിലപാട്. ഇതിനായി പ്രദേശങ്ങളുടെ പ്രത്യേകത മനസിലാക്കി നീക്കുപോക്കുകള് നടത്താനാണ് നിര്ദ്ദേശം. യുവാക്കളുടെ ബിജെപി മേല്ക്കൈ നേടിയാല് പിന്നീട് തിരിച്ചുപിടിക്കുക ബുദ്ധിമുട്ടിലാണന്നും നേതാക്കള് പറയുന്നു.
ബിജെപിക്കെതിരെ മുന്നണികള് യോജിച്ചതോടെ പൂര്വാധികം ശക്തിയോടെ പ്രവര്ത്തനങ്ങള് ഊര്ജ്ജിതമാക്കാന് എന്ഡിഎ നേതൃയോഗം തീരുമാനിച്ചു. പരമാവധി വോട്ടുകള് സമാഹരിച്ച് കൊട്ടാരക്കരയിലെ പ്രബലശക്തിയായി മാറുന്നതിനൊപ്പം വിജയത്തില്കുറഞ്ഞൊന്നും എന്ഡിഎ പ്രതീക്ഷിക്കുന്നില്ലന്നും നേതാക്കള് പറയുന്നു. ബിജെപി വോട്ടിനൊപ്പം കൂടെ നില്ക്കുന്ന സമുദായസംഘടനകളുടെ ശക്തി വോട്ടായി മാറിയാല് കൊട്ടാരക്കരയില് ചരിത്രം രചിക്കാന് കഴിയുമെന്നാണ് പ്രതീക്ഷ.
