കോഴഞ്ചേരി: എന്ഡിഎ മുന്നണി ഭരണത്തിന്റെ കീഴില് ന്യൂനപക്ഷങ്ങള് ഇടതു വലതു മുന്നണികളുടെ ഭരണത്തേക്കള് സുരക്ഷിതരാണെന്ന് ബിജെപി ദേശീയ സമിതിയംഗവും മുന് ന്യൂനപക്ഷ മോര്ച്ച സംസ്ഥാന വൈസ് പ്രസിഡന്റുമായ അഡ്വ.നൗഷാദ് പറഞ്ഞു. ആറന്മുള നിയോജകണമണ്ഡലം എന്ഡിഎ സ്ഥാനാര്ത്ഥി എം.ടി.രമേശിന്റെ തെരഞ്ഞെടുപ്പ് പ്രചരണാര്ത്ഥം നാരങ്ങാനം കണമുക്ക് ജംഗ്ഷനില് നടന്ന പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കഴിഞ്ഞ അറുപത് വര്ഷം കേരളം മാറിമാറി ഭരിച്ച ഇടതു വലതു മുന്നണികള് ന്യൂനപക്ഷങ്ങളെ ബിജെപിയില് നിന്ന് അകറ്റിനിര്ത്താന് ബോധപൂര്വ്വമായ ശ്രമങ്ങളാണ് നടത്തുന്നത്. ഇന്നും ഇത് തുടര്ന്നുകൊണ്ടിരിക്കുന്നു. എന്നാല് നരേന്ദ്രമോദി സര്ക്കാരിന്റെ ഭരണം ഇടതു വലതു മുന്നണികളുടെ കള്ളപ്രചരണത്തെ ന്യൂനപക്ഷങ്ങള്ക്ക് മനസ്സിലാക്കാന് കഴിഞ്ഞിട്ടുണ്ട്. കേരളത്തില് അനേകം മുസ്ലിം , ക്രിസ്ത്യന് കുടുംബങ്ങള് ബിജെപിയില് ചേരുവാന് തയ്യാറായി.ഇതിന്റെ പ്രതിഫലനം ഈ തെരഞ്ഞെടുപ്പില് എന്ഡിഎ സഖ്യത്തിന്റെ വിജയത്തിലൂടെ ഇരു മുന്നണികള്ക്കുമുള്ള താക്കീതായി മാറുമെന്നും അഡ്വ.നൗഷാദ് തന്റെ പ്രസംഗത്തില് പറഞ്ഞു. എന്ഡിഎ പഞ്ചായത്ത് കമ്മിറ്റി ചെയര്മാന് സി.എന്.രാജേന്ദ്രന് അദ്ധ്യക്ഷതവഹിച്ചു. ബിജെപി നിയോജകമണ്ഡലം പ്രസിഡന്റ് അജിത്ത് പുല്ലാട്, നിയോജകമണ്ഡലം ജനറല് സെക്രട്ടറി കെ.ജി.സുരേഷ്കുമാര്, പഞ്ചായത്ത് പ്രസിഡന്റ് എം.എസ്.അനില്കുമാര്, ലാല് പ്രസാദ് ഭട്ടതിരി, വി.പ്രസാദ് എന്നിവര് സംസാരിച്ചു.
