ആലപ്പുഴ: ആകാശം മുട്ടി ആവേശം, പരസ്യപ്രചാരണത്തിന് സമാധാനപരമായ അവസാനം. ഇന്ന് നിശബ്ദ പ്രചാരണം, തെരഞ്ഞെടുപ്പിന്റെ ഫലത്തെ തന്നെ ബാധിക്കുന്നത് ഇന്നത്തെ നിശബ്ദ പ്രചാരണമാണ്. അവസാന തന്ത്രങ്ങള് സ്ഥാനാര്ത്ഥികളും, മുന്നണികളും പയറ്റുന്നത് ഇന്നാണ്. ഇന്നലെ കൊട്ടിക്കലാശത്തിന്റെ അവസാന മണിക്കൂറുകളില് ആവേശം ഉച്ഛസ്ഥായിയിലായിരുന്നു.
എല്ലാ സ്ഥലങ്ങളിലും ശക്തിപ്രകടനമായി മാറി കൊട്ടിക്കലാശം, നിരവധി വാഹനങ്ങളും വാദ്യമേളങ്ങളും ശബ്ദകോലാഹലങ്ങളും കൊഴുപ്പേകി. ചില സ്ഥലങ്ങളെങ്കിലും പൊതുജനങ്ങളെ ബുദ്ധിമുട്ടിക്കുന്നതായി മാറി പ്രചാരണത്തിന്റെ സമാപനം. രണ്ടു മാസത്തോളം നീണ്ടുനിന്ന പരസ്യപ്രചാരണത്തിനാണ് അന്ത്യമായത്.
അമ്പലപ്പുഴ മണ്ഡലത്തിലെ ബിജെപി സ്ഥാനാര്ത്ഥി എല്.പി ജയചന്ദ്രന്റെ പ്രചാരണകൊട്ടിക്കലാശം ആലപ്പുഴ എവിജെ ജങ്ഷനിലായിരുന്നു. ആലപ്പുഴ മണ്ഡലം എന്ഡിഎ സ്ഥാനാര്ഥി അഡ്വ. രണ്ജിത്ത് ശ്രീനിവാസന്റെ പ്രചാരണ സമാപനം കലവൂരിലായിരുന്നു. കുട്ടനാട്ടില് എന്ഡിഎ സ്ഥാനാര്ത്ഥി സുഭാഷ് വാസുവിന്റെ കൊട്ടിക്കലാശം മങ്കൊമ്പിലായിരുന്നു.
കുട്ടനാടിനെ ഇളക്കി മറിക്കുന്നതായിരുന്നു പ്രചാരണത്തിന്റെ സമാപനം. ഇരുമുന്നണികളും പ്രചാരണത്തില് ഏറെ പിന്നിലാണെന്ന് വ്യക്തമാക്കുന്നതായി സുഭാഷ് വാസുവിന്റെ പ്രചാരണത്തിന്റെ കൊട്ടിക്കലാശം. മാവേലിക്കര മണ്ഡലത്തില് എന്ഡിഎ സ്ഥാനാര്ഥി പി.എം. വേലായുധന്റെ പ്രചാരണത്തിന്റെ കൊട്ടിക്കലാശവും ആവേശ്വജ്ജ്വലമായിരുന്നു. കായംകുളത്തെ എന്ഡിഎ സ്ഥാനാര്ത്ഥി ഷാജി എം. പണിക്കരുടെ പ്രചാരണ കൊട്ടിക്കലാശം പ്രവര്ത്തക പങ്കാളിത്തം കൊണ്ട് ശ്രദ്ധേയമായി.
ചെങ്ങന്നൂരില് എന്ഡിഎ സ്ഥാനാര്ത്ഥി അഡ്വ. പി.എസ്. ശ്രീധരന്പിള്ളയുടെ വിജയം ഉറപ്പിക്കുന്നതായി മാറി പ്രചാരണത്തിന്റെ സമാപനം. കൊട്ടിക്കലാശം അക്ഷരാര്ത്ഥത്തില് വിജയക്കോടി നാട്ടലായി.ഹരിപ്പാട് മണ്ഡലത്തില് എന്ഡിഎ സ്ഥാനാര്ഥി ഡി.അശ്വിനിദേവിന്റെ കൊട്ടിക്കലാശവും വൈവിദ്ധ്യം കൊണ്ട് ശ്രദ്ധേയമായി.
ചേര്ത്തലയില് എന്ഡിഎ സ്ഥാനാര്ഥി പി.എസ്. രാജീവിന്റെ പ്രചാരണം സമാപിച്ചത് സ്വകാര്യ ബസ് സ്റ്റാന്ഡിന് പരിസരത്തായിരുന്നു. അരൂര് മണ്ഡലത്തില് എന്ഡിഎ സ്ഥാനാര്ത്ഥി ടി. അനിയപ്പന്റെ പ്രചാരണം കുത്തിയതോട്ടില് സമാപിച്ചു. തെരഞ്ഞടുപ്പിന് മണിക്കുറുകള് മാത്രം അവശേഷിക്കെ എന്ഡിഎ തികഞ്ഞ ആത്മവിശ്വസത്തിലാണ്.
ഇടതുവലതു മുന്നണികള് പല മണ്ഡലങ്ങളിലും വോട്ടുമറിക്കാന് ധാരണയായി കഴിഞ്ഞതായാണ് വിവരം.
