കൊല്ലം: പരവൂര് ദുരന്തത്തിന് ഉത്തരവാദി പോലീസാണെന്ന് തുറന്നടിച്ച ജില്ലാ കളക്ടര് ഷൈനാമോളുടെ പരസ്യപ്രസ്താവനകള്ക്ക് വിലക്കേര്പ്പെടുത്താന് സര്ക്കാരിന്റെ നീക്കം.
കഴിഞ്ഞ ദിവസം നടന്ന മന്ത്രിസഭായോഗത്തിന്റേതാണ് തീരുമാനം. ദുരന്തഭൂമിയില് വിവാദം സൃഷ്ടിച്ച് സംസ്ഥാന സര്ക്കാരിന്റെ മേലും ആഭ്യന്തര വകുപ്പിനുമേലും കുറ്റം ചുമത്താന് കളക്ടര് ശ്രമിച്ചതായി മന്ത്രിസഭയിലെ ഭൂരിഭാഗം മന്ത്രിമാരും അഭിപ്രായപ്പെട്ടു. കളക്ടറുടെ നിലപാട് ചോദ്യം ചെയ്യണമെന്ന ആവശ്യവും മന്ത്രിസഭാ യോഗത്തില് ഉയര്ന്നു. അതേസമയം സിറ്റി പോലീസ് കമ്മീഷണര്ക്കെതിരെ രംഗത്ത് വന്ന കളക്ടര്ക്കെതിരെ ഒരുമിച്ച് നിന്ന് പൊരുതാനാണ് പോലീസ് വകുപ്പിലെ ചില ഉന്നതരുടെ നീക്കം.
കളക്ടറുടെ നിലപാട് അഭ്യന്തരവകുപ്പിനെ കുറ്റക്കാരാക്കുമെന്ന് വകുപ്പുമന്ത്രി രമേശ്ചെന്നിത്തലയെയും മുഖ്യമന്ത്രി ഉമ്മന്ചാണ്ടിയെയും ഇവര് ധരിപ്പിച്ചു. റവന്യൂവകുപ്പ് ഇടപ്പെട്ട് കളക്ടറുടെ ഇത്തരം പരസ്യപ്രസ്താവന നിര്ത്തണമെന്നാവശ്യവും ഇവര് ഉന്നയിച്ചിട്ടുണ്ട്. അതേസമയം കളക്ടര് റവന്യൂവകുപ്പ് മന്ത്രിക്ക് നല്കിയ റിപ്പോര്ട്ട് പ്രകാരം പോലീസാണ് കുറ്റക്കാരെന്ന് വ്യക്തമായി എഴുതിയിട്ടുമുണ്ട്. അങ്ങനെയെങ്കില് പോലീസിന് മേല് സമ്മര്ദ്ദം ചെലുത്തിയ രാഷ്ട്രീയപാര്ട്ടിയുടെ നേതാക്കന്മാരും കുടുങ്ങും. ഈ അവസ്ഥയില് നിന്നും രക്ഷപ്പെടാനാണ് ഇപ്പോള് സംസ്ഥാന സര്ക്കാര് ശ്രമിക്കുന്നത്. കളക്ടറെ പൂട്ടിയില്ലെങ്കില് പിന്നീട് അത് സര്ക്കാരിനെ കാര്യമായി ബാധിക്കുമെന്നും തെരഞ്ഞെടുപ്പില് ഇത് പ്രതികൂലമകുമെന്നാണ് മന്ത്രിസഭായോഗത്തിലുയര്ന്നത്. അതേസമയം ഉദ്യോഗസ്ഥതലത്തില് കളക്ടര് ഷൈനാമോള്ക്കെതിരെ നീക്കം നടക്കുന്നുണ്ട്.
