പാലാ: കേരളത്തില് തുല്യനീതി ഉറപ്പാക്കാന് ദേശീയ ജനാധിപത്യസംഖ്യം അധികാരത്തില് വരണമെന്ന് ദേശീയ നിര്വ്വാഹസമിതിയംഗം അല്ഫോന്സ് കണ്ണന്താനം പറഞ്ഞു. പാലായില് ഇന്നലെ നടന്ന എന്ഡിഎ കണ്വന്ഷന് ഉദ്ഘാടനം ചെയ്യുകയായിരുന്നു അദ്ദേഹം. യുവാക്കള്ക്ക് തൊഴില് നല്കാന് സംസ്ഥാന സര്ക്കാരിന് പദ്ധതികളില്ല. വിദ്യാഭ്യാസമുള്ള യുവക്കള് തൊഴില്തേടി വിദേശത്തേക്ക് പോവുകയാണ്. സംസ്ഥാനത്ത് വ്യവസായം ആരംഭിക്കാന് വ്യവസായികളും തയ്യാറാകുന്നില്ല. മുഴുവന് ജനങ്ങളുടെയും വിശ്വാസമാര്ജ്ജിച്ച പ്രധാനമന്ത്രിയാണ് ഭാരതം ഭരിക്കുന്നത്. ഏതുതരത്തിലുള്ള വിശ്വാസികളെയും ഉള്ക്കൊള്ളുവാന് തയ്യാറുള്ള നരേന്ദ്രമോദിയാണ് ഇന്ന് ഭാരതം ഭരിക്കുന്നത്. ഇന്ന് രാജ്യത്ത് വര്ഗ്ഗീയ സംഘര്ഷങ്ങള് ഉണ്ടാകുന്നില്ല. മുഴുവന് ജനവിഭാഗങ്ങള്ക്കും ബാങ്ക് അക്കൗണ്ട്, ഇന്ഷുറന്സ് പരിരക്ഷ, മുഴുവന് വീടുകള്ക്കും സൗജന്യ എല്പിജി കണക്ഷന് എന്നിവ നല്കുന്നുണ്ട്. ഭാരതത്തിലെ വ്യാവസായിക വളര്ച്ച ലോകരാജ്യങ്ങളെ അത്ഭുതപ്പെടുത്തുന്നുവെന്നും അദ്ദേഹം പറഞ്ഞു.
ബിജെപി ജില്ലാ വൈസ് പ്രസിഡന്റുമാരായ ടി.ആര്. നരേന്ദ്രന്, എന്.കെ. ശശികുമാര്, വത്സല ഹരിദാസ്, എന്ഡിഎ കണ്വീനര് അഡ്വ. ബിനു പുളിക്കക്കണ്ടം എന്നിവര് പ്രസംഗിച്ചു. കുരിശുപള്ളിക്കവലയില്നിന്നും എന്ഡിഎ സ്ഥാനാര്ത്ഥി എന്. ഹരിയെ സമ്മേളനവേദിയിലേക്ക് സ്വീകരിച്ച് ആനയിച്ചു. എന്ഡിഎ നേതാക്കളും ബിജെപി നേതാക്കളും സ്ഥാനാര്ത്ഥിയെ ഹാരമണിയിച്ചു.
