ആലപ്പുഴ: വോട്ടര്മാര്ക്ക് നിര്ഭയമായി സമ്മതിദാന അവകാശം നിര്വഹിക്കുവാനുള്ള സുരക്ഷാ സൗകര്യങ്ങള് ഒരുക്കുമെന്ന് ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടര് ആര്. ഗിരിജയും ജില്ലാ പോലീസ് മേധാവി പി.അശോക് കുമാറും പറഞ്ഞു. അമ്പലപ്പുഴ, കുട്ടനാട് നിയോജക മണ്ഡലങ്ങളിലെ പ്രശ്ന സാധ്യതാ ബൂത്തുകളും മാതൃകാ പോളിങ് സ്റ്റേഷനുകളും സന്ദര്ശിക്കുകയായിരുന്നു ഇവര്.
അതീവ പ്രശ്ന ബാധിത ബൂത്തുകളില് പോളിങ് ജോലികള് നേരിട്ട് നിരീക്ഷിക്കുന്നതിന് വെബ് കാസ്റ്റിങ് അടക്കമുള്ള സംവിധാനങ്ങള് ഒരുക്കും. പ്രശ്ന സാധ്യതാബൂത്തുകളില് കൂടുതല് പോലീസിനെ നിയോഗിക്കും. വീഡിയോ റെക്കോര്ഡിങ് ഏര്പ്പെടുത്തും. അമ്പലപ്പുഴ നിയോജക മണ്ഡലത്തിലെ കരുമാടി സെന്റ് നിക്കോളാസ് എല്പി സ്കൂള്, കുട്ടനാട് മണ്ഡലത്തിലെ തകഴി ചിറയകം ഗവണ്മെന്റ് യുപിഎസ്, തകഴി ശിവശങ്കരപ്പിള്ള സ്മാരക യുപി സ്കൂള് , തെന്നടി ഗവണ്മെന്റ് എല്പി സ്കൂള്, കുന്നുമ്മ ഹോളിഫാമിലി എല്പിഎസ്. എന്നിവിടങ്ങള് സന്ദര്ശിച്ച് കളക്ടറും ജില്ലാ പോലീസ് മേധാവിയും സുരക്ഷാ ക്രമീകരണങ്ങള് വിലയിരുത്തി.
മോഡല് പോളിങ് സ്റ്റേഷനുകളില് കുടിവെള്ളം ഉള്പ്പടെയുള്ള സൗകര്യങ്ങള് ഏര്പ്പെടുത്താന് കളക്ടര് നിര്ദ്ദേശം നല്കി. ജില്ലയിലെ പ്രശ്ന സാധ്യതാ ബൂത്തുകളുടെ ലിസ്റ്റ് പൊലീസ് തയ്യാറാക്കിയിട്ടുണ്ട്. അതീവ പ്രശ്ന ബാധിത ബൂത്തുകളുടെ ലിസ്റ്റ് തയ്യാറാക്കി വരുന്നു.
