കോഴിക്കോട്: ശ്രീകണ്ഠേശ്വരക്ഷേത്രത്തില് ദര്ശനം നടത്തി ബിഡിജെഎസ് എന്ഡിഎ സ്ഥാനാര്ത്ഥി സതീഷ് കുറ്റിയില് കോഴിക്കോട് സൗത്ത് മണ്ഡലത്തില് തെരഞ്ഞെടുപ്പ് പ്രചാരണത്തിന് തുടക്കമിട്ടു. ഇന്നലെ രാവിലെ ക്ഷേത്രനടയില് നൂറുകണക്കിന് ബിജെപി, ബിഡിജെഎസ് പ്രവര്ത്തകരുടെ അകമ്പടിയോടെ ക്ഷേത്രനടയില് എത്തിയ സ്ഥാനാര്ത്ഥിയെ ശ്രീകണ്ഠേശ്വരം ക്ഷേത്രയോഗം വൈസ് പ്രസിഡന്റ് പി. സുന്ദര്ദാസ് പൂച്ചെണ്ട് നല്കി സ്വീകരിച്ചു.
തുടര്ന്ന് കാശ്യപാശ്രമത്തിലെത്തിയ സതീഷിനെ കാശ്യപാശ്രമം കുലപതി ആചാര്യ എം.ആര്. രാജേഷ് പൊന്നാടയും ഷാളുമണിയിച്ച് സ്വീകരിച്ചു. തുടര്ന്ന് തിരുവണ്ണൂരിലെത്തി സാമൂതിരി രാജാവിന്റെ അനുഗ്രഹം വാങ്ങിയ ശേഷം കൈതപ്രം ദാമോദരന് നമ്പൂതിരിയുടെയും ബലിദാനി ക്യാപ്റ്റന് വിക്രമിന്റെയും വീടുകള് സന്ദര്ശിച്ചു. വിക്രമിന്റെ അന്ത്യവിശ്രമസ്ഥലത്ത് പുഷ്പാര്ച്ചന നടത്തി.
തിരുവണ്ണൂര് നടയില് ബിജെപി പ്രവര്ത്തകര് സ്ഥാനാര്ത്ഥിക്ക് ബാന്റുമേളത്തിന്റെ അകമ്പടിയോടെ വന് സ്വീകരണമാണ് നല്കിയത്. ബിജെപി ജില്ലാ ട്രഷറര് ടി.വി. ഉണ്ണിക്കൃഷ്ണന്, മണ്ഡലം പ്രസിഡന്റ് പി.കെ. അജിത് കുമാര്, ജനറല് സെക്രട്ടറി എന്.വി. ദിനേശന്, കെ.പി. ശിവദാസന്, വിജയകൃഷ്ണന്, ബിഡിജെഎസ് ജില്ലാ സെക്രട്ടറി ഷാജു ചമ്മിനി, ജോ.സെക്രട്ടറി പി.സി. അശോകന്, സൗത്ത് മണ്ഡലം പ്രസിഡന്റ് ഉണ്ണിക്കൃഷ്ണന് കരിപ്പാലി, സെക്രട്ടറി കെ.പി. രാജീവന്, തുടങ്ങിയവര് പങ്കെടുത്തു. കൊല്ലം പരവൂര് വെടിക്കെട്ട് ദുരന്തത്തിന്റെ പശ്ചാത്തലത്തില് ഉച്ചയ്ക്ക്ശേഷമുള്ള പരിപാടികള് റദ്ദാക്കി.
