ന്യൂദല്‍ഹി: സാധാരണ ബള്‍ബുകളും സിഎഫ്എല്‍ വിളക്കുകളും ട്യൂബുകളും മാറ്റി പകരം എല്‍ഇഡി വിളക്കുകള്‍ വരുന്നതോടെ ഒരു സാധാരണ കുടുംബത്തിന് പ്രതിവര്‍ഷം വരുന്ന ശരാശരി ലാഭം 4000 രൂപ. വൈദ്യതിച്ചാര്‍ജിലും ബള്‍ബുകള്‍ മാറ്റേണ്ടിവരുന്നതിലും വരുന്ന കുറവാണിത്. ചെലവില്‍ രാജ്യത്തൊട്ടാകെ കോടിക്കണക്കിന് രൂപയുടെ കുറവു വരും.മാത്രമല്ല ഊര്‍ജ്ജം ലാഭിക്കാനും കഴിയും. മറ്റു ബള്‍ബുകളില്‍ നിന്നുള്ള തരം കാര്‍ബണ്‍ ഡയോക്‌സൈഡ് ഉല്‍സര്‍ജ്ജനവും കുറവാണ്.
അതിനാല്‍ അന്തരീക്ഷ മലിനീകരണവും കുറവാണ്.
ഒരു സാധാരണ കുടുംബത്തില്‍ ശരാശരി അഞ്ചു ബള്‍ബ് പോയിന്റുകള്‍ ഉണ്ടാകും. ഈ ബള്‍ബുകള്‍ക്കു പകരം അഞ്ച് എല്‍ഇഡി ബള്‍ബുകള്‍ ഉപയോഗിച്ചാല്‍ ദിവസം 1.77 വാട്ട് വൈദ്യുതി ലാഭിക്കാം. അതായത് വര്‍ഷം 649 വാട്ട്. ഒരു വാട്ടിന് നാലു രൂപ വച്ച് പ്രതിവര്‍ഷം 2550 രൂപ ലാഭിക്കാം. മാത്രമല്ല എല്‍ഇഡി ബള്‍ബുകള്‍ക്ക് ആയുസ് വളരെക്കൂടുതലാണ്. മറ്റുള്ളവ മാറിയിടേണ്ടി വരുന്നതുപോലെ എല്‍ഇഡി ബള്‍ബുകള്‍ മാറ്റേണ്ടതില്ല.
ഒരു ബള്‍ബ് 25000 മണിക്കൂര്‍ കത്തും. അതായത് രണ്ടു വര്‍ഷവും പത്തുമാസവുമാണ് ഒരു എല്‍ഇഡി ബള്‍ബിന്റെ ആയുസ്. (സിഎഫ്എല്‍ ബള്‍ബിന് 8000 മണിക്കൂറാണ് ആയുസ്. മറ്റുള്ളവയ്‌ക്ക് 1200 മണിക്കൂര്‍ മാത്രമാണ് ആയുസ്. അതായത് ബള്‍ബുകള്‍ മാറ്റിയിടേണ്ടി വരുന്നതുമൂലം പ്രതിവര്‍ഷം1250 രൂപയും ചെലവ് വരും. എല്‍ഇഡി ഉപയോഗിച്ചാല്‍ ഇത് കുറയും. അങ്ങനെ മൊത്തം 4000 രൂപ.
പ്രതിവര്‍ഷം നൂറു കോടി യൂണിറ്റ് വൈദ്യുതിയാണ് രാജ്യത്തൊട്ടാകെ ലാഭിക്കാന്‍ കഴിയുന്നത്. മൊത്തം ലാഭിക്കാന്‍ കഴിയുന്നത് 40,000 കോടി രൂപയും.
ഡെല്‍പ്പ് (ഡൊമസ്റ്റിക് എഫിഷ്യന്റ് ലൈറ്റിംഗ് പ്രോഗ്രാം) എന്ന പദ്ധതി കേന്ദ്ര സര്‍ക്കാര്‍ രാജ്യമൊട്ടാകെ നടപ്പാക്കി വരികയാണ്.
സാധാരണ ബള്‍ബുകളും സിഎഫ്എല്‍ ബള്‍ബുകളും ട്യൂബുകളും മാറ്റി പകരം എല്‍ഇഡി ബള്‍ബുകളും ട്യൂബുകളും പിടിപ്പിക്കാനുള്ളതാണ് പദ്ധതി. ഈ പദ്ധതി വഴി രാജ്യത്തൊട്ടാകെ ഏപ്രില്‍ ആറു വരെയായി 9.17 കോടി എല്‍ഇഡി ബള്‍ബുകളാണ് കുറഞ്ഞവിലയ്‌ക്കും, ദാരിദ്യ രേഖയ്‌ക്ക് താഴെയുള്ളവര്‍ക്ക് സൗജന്യമായും വിതരണം ചെയ്തത്. രാജ്യത്തൊട്ടാകെ 7,50,780 തെരുവുവിളക്കുകളും എല്‍ഇഡിയാക്കിക്കഴിഞ്ഞു. മുന്നൂറു രൂപയ്‌ക്കു മുകളില്‍ വരുന്ന ഇല്‍ഇഡി ബള്‍ബുകള്‍ 90 രൂപയ്‌ക്കാണ് കേന്ദ്രം വിതരവണം ചെയ്യുന്നത്. അതത് സംസ്ഥാനങ്ങള്‍ വഴിയാണ് പദ്ധതി നടപ്പാക്കുന്നത്.
പ്രതികരിക്കാൻ ഇവിടെ എഴുതുക: