അരൂര്: കഞ്ചാവ് വില്പനക്ക് എതിരെ കര്ശന നടപടി സ്വീകരിച്ച എസ്ഐ യെ സ്ഥലം മാറ്റാന് കഞ്ചാവ് മാഫിയായുടെ ശ്രമം. കഴിഞ്ഞ ദിവസം ഏഴ് കിലോയോളം കഞ്ചാവുമായി മയക്കുമരുന്ന് ശൃംഖലയിലെ മുഖ്യ കണ്ണികളായ രണ്ടു പേരെ വലയിലാക്കിയതിന് തൊട്ടു പിന്നാലെയാണ് അരൂര് എസ്ഐയുടെ സ്ഥാനചലനത്തിന് ചരടുവലികളുമായി കഞ്ചാവ് മാഫിയ ഉന്നതതലത്തില് നീക്കം തുടങ്ങിയത്. ആറ് മാസങ്ങള് മുന്പാണ് എസ്ഐയായി കെ.ജി.പ്രതാപ്ചന്ദ്രന് ചുമതലയേറ്റത്. കുറഞ്ഞ മാസങ്ങള് കൊണ്ട് കഞ്ചാവ് മയക്കുമരുന്ന് മാഫിയാ സംഘങ്ങളെ അമര്ച്ച ചെയ്യുവാന് എഴുപത്തിമൂന്നോളം റെയ്ഡുകളാണ് ഇദ്ദേഹത്തിന്റെ നേത്യത്വത്തില് വിവിധ പ്രദേശങ്ങളിലായി നടത്തിയത്. റിട്ട. എസ്ഐ ഉള്പ്പടെ ഉന്നതതല ബന്ധങ്ങളുള്ള കഞ്ചാവ് കടത്തുകാരെ സ്ക്വാഡ് അറസ്റ്റ് ചെയ്തു.
80 കഞ്ചാവ് കേസുകള് രജിസ്റ്റര് ചെയ്തു. ഒരു കോടിരൂപയോളം വിലമതിക്കുന്ന കഞ്ചാവ് പുകയില ഉല്പന്നങ്ങള് പിടികൂടി. കഴിഞ്ഞ ദിവസം അരൂരില് നടന്നത് സംസ്ഥാനത്തെ വലിയ കഞ്ചാവ് വേട്ടകളിലൊന്നാണ്. വാഹനപരിശോധനയില് അരൂരില് നിന്ന് ലഭിച്ച പ്രതിയുമായി കൊല്ലം ചെങ്കോട്ടവരെ പിന്തുടര്ന്നാണ് മുഖ്യപ്രതിയെ പിടികൂടിയത്. കഞ്ചാവ് മാഫിയാക്കെതിരെ കൊച്ചിയിലേക്കും സമീപ ജില്ലകളിലേക്കും അന്വേഷണം വ്യാപിപ്പിച്ചതോടെയാണ് എസ്ഐയെ നാട് കടത്താന് ചരടുവലികള് തുടങ്ങിയത്. നാട്ടില് ക്രമസമാധാനം ഉറപ്പാക്കുന്നതിനായി പരിശ്രമിച്ച പോലീസ് ഓഫീസറെ മാറ്റാനുള്ള നീക്കത്തിനെതിരെ വിവിധ സംഘടനകളും പ്രസ്ഥാനങ്ങളും പ്രതിഷേധവുമായി രംഗത്ത് എത്തിയിട്ടുണ്ട്.
