ആലപ്പുഴ: മണ്ണും ഗ്രാവലും വാഹനങ്ങളില് കൊണ്ടുപോകുന്നതിനു ജിയോളജി വകുപ്പ് നല്കുന്ന ട്രാന്സിറ്റ് പാസില് ലക്ഷ്യസ്ഥാനത്തിന്റെ കൃത്യമായ പേരും സര്വേ നമ്പരും അതിരുകളും നിര്ബന്ധമായും രേഖപ്പെടുത്താന് ജില്ലാ കളക്ടറുടെ നിര്ദേശം. അനധികൃത മണ്ണു ഖനനവും കടത്തലും നിലംനികത്തലും മറ്റും തടയുന്നതു ലക്ഷ്യമിട്ടാണ് നടപടി.
മണ്ണും ഗ്രാവലും കൊണ്ടുപോകുന്നതിന് ട്രാന്സിറ്റ് പാസ്(ഒഎ) അനുവദിക്കുമ്പോള് നിലവില് പാസിന്റെ ക്രമ നമ്പര് 10ല് സ്ഥലത്തിന്റെ പേരു മാത്രമാണ് ചേര്ത്തിരുന്നത്. വിശാലമായ സ്ഥലത്തിന്റെ പേര് ചേര്ക്കുന്നതു മൂലം ഈ പ്രദേശത്ത് എവിടേക്കും മണ്ണു കൊണ്ടുപോയി ദുരുപയോഗം ചെയ്യുന്ന സ്ഥിതി ശ്രദ്ധയില്പ്പെട്ടതിനെത്തുടര്ന്നാണ് നടപടി. വാഹനങ്ങള് പരിശോധിക്കുമ്പോള് മണ്ണു കൊണ്ടുപോകുന്ന കൃത്യം സ്ഥലം തിരിച്ചറിയാന് കഴിഞ്ഞിരുന്നില്ല.
പാസില് ലക്ഷ്യസ്ഥാനത്തിന്റെ കൃത്യമായ പേര്, സര്വ്വേ നമ്പര്, അതിരുകള് എന്നിവ രേഖപ്പെടുത്താന് ജിയോളജിസ്റ്റിന് ജില്ലാ കളക്ടര് ആര്. ഗിരിജ രേഖാമൂലം നിര്ദേശം നല്കി. അല്ലാത്ത പാസുകള് നല്കുന്നത് ശ്രദ്ധയില്പ്പെട്ടാല് കര്ശന നടപടി സ്വീകരിക്കും.
