ആലപ്പുഴ: ആലപ്പുഴ ബീച്ചില് നിന്നും വീണ്ടും അനധികൃതമായി മണല് കടത്തുന്നു. അര്ദ്ധരാത്രിക്കു ശേഷവും പുലര്ച്ചെയുമായാണു ചാക്കുകളിലും ട്രോളികളിലുമായി കടല്ത്തീരത്തുനിന്നു മണല് കടത്തുന്നത്. നഗരത്തില് പുതുതായി നിര്മിച്ച വീടുകളുടെ മുന്വശത്തു ഇടുന്നതിനും കല്യാണം അടക്കമുള്ള പരിപാടികള് നടക്കുന്ന സ്ഥലത്തു ഇടുന്നതിനുമായാണ് മണല് കൂടുതല് കടത്തുന്നതെന്നു പ്രദേശവാസികള് പറയുന്നു.
മണല് ആവശ്യമുള്ളവര് ഏജന്റുമാരെ സമീപിച്ചാല് പറഞ്ഞദിവസം സാധനം വീട്ടിലെത്തിച്ചു നല്കും. ട്രോളി കണക്കാണു വാങ്ങുന്നതെങ്കില് ഒന്നിന് 750 മുതല് 800 രൂപ വരെയാണ് വാങ്ങുന്നത്. ദൂരം കൂടുന്നതിനനുസരിച്ച് പ്രതിഫലം കൂടും. മിനി ലോറികളിലും ചെറിയ ടിപ്പറുകളിലും മണ്ണ് എത്തിച്ചു നല്കുന്നതിനു 10,000 മുതല് 12,000 വരെയാണ് ഈടാക്കുന്നത്.
കടപ്പുറത്തുനിന്നും ചാക്കുകളിലും ട്രോളികളിലുമായി കടത്തുന്ന മണ്ണ് കടല്ത്തീരത്തെ ആള് സഞ്ചാരം അധികമില്ലാത്ത പ്രദേശത്തു പാര്ക്കു ചെയ്തിരിക്കുന്ന ചെറിയ വാഹനങ്ങളില് കയറ്റിയാണു കടത്തുന്നത്. ബീച്ചില് പോലീസ് ഔട്ട് പോസ്റ്റ് പ്രവര്ത്തിക്കുന്നുണ്ടെങ്കിലും അനധികൃത മണല് കൊള്ള തടയാന് കഴിഞ്ഞിട്ടില്ല.
പരിസ്ഥിതി പ്രാധാന്യമേറെയുള്ള തീരപ്രദേശത്തുനിന്നും മണല് കടത്തുന്നത് തീരത്തിന്റെ പരിസ്ഥിതിയെ ഗുരുതരമായി ബാധിച്ചിട്ടുണ്ട്. തീരദേശ റോഡിലും ബീച്ചിലും രാത്രികാലങ്ങളിലും പുലര്ച്ചെയും പട്രോളിംഗ് ഏര്പ്പെടുത്തിയാല് ഒരു പരിധിവരെ മണല് കടത്ത് തടയാന് കഴിയും.
