ചങ്ങനാശേരി: ചങ്ങനാശേരി നിയോജകമണ്ഡലത്തിലെ വിവിധ പഞ്ചായത്തുകളില് കുടിവെള്ള വിതരണം അവതാളത്തിലായതോടെ ജനം ദുരിതത്തില്. പായിപ്പാട്, തൃക്കൊടിത്താനം, മാടപ്പള്ളി, വാഴപ്പള്ളി, നഗരസഭാ പ്രദേശത്തെ ജല വിതരണമാണ് ജനങ്ങളെ ദുരിതത്തിലാക്കുന്നത്. ചെറുകരക്കുന്ന് ജലസംഭരണിയില്നിന്നുള്ള ജലവിതരണം താറുമാറായതോടെ കുടിവെള്ളം കിട്ടാനില്ലാതെ ജനം നെട്ടോട്ടത്തിലാണ്. കല്ലിശേരി, കറ്റോട് എന്നിവിടങ്ങളില് നിന്നും വെള്ളം പമ്പുചെയ്ത് ചെറുകരക്കുന്ന് ശേഖരണിയില് സംഭരിച്ചാണ് ഈ പ്രദേശങ്ങളില് ജലവിതരണം നടത്തുന്നത്. നിലവിലുള്ള പഴകിയ ജലവിതരണക്കുഴലുകള് പലയിടത്തും പൊട്ടിയൊഴുകുന്നതാണ് വിതരണത്തിന് തടസ്സം സൃഷ്ടിക്കുന്നത്. ജലം ലഭിക്കുന്ന ദിവസങ്ങള് വളരെ കുറവാണ്. എന്നാല് വിതരണം നടക്കുന്ന ദിവസങ്ങളില്പോലും കുഴലിലൂടെയുള്ള ജലത്തിന്റെ ഒഴുക്കിന് ശക്തി കുറവായതിനാല് തുള്ളി തുള്ളിയായാണ് ടാപ്പിലൂടെ വെള്ളമെത്തുന്നത്. പമ്പിംഗിന് ഇടയിലുള്ള വൈദ്യുതി തടസ്സവും ജലവിതരണത്തെ കാര്യമായി ബാധിക്കുന്നുണ്ട്. വേനല് കനത്തതോടെ പ്രദേശത്തെ കിണറുകള് വറ്റി വരണ്ടതിനാല് ഗാര്ഹിക ആവശ്യങ്ങള്ക്കുപോലും ജലം ലഭിക്കുന്നില്ല. ജലവിഭവ വകുപ്പിന്റെ ജലവിതരണംകൂടി തകര്ന്നതോടെ വെള്ളം കിട്ടാതെ ജനം വലയുകയാണ്. ഉയര്ന്ന പ്രദേശങ്ങളിലാണ് ജനങ്ങള് വെള്ളത്തിനായി ഏറെ ബുദ്ധിമുട്ടുന്നത്. കഴിഞ്ഞ കാലങ്ങളില് തദ്ദേശസ്വയംഭരണ സ്ഥാപനങ്ങള് വേനല്കാലത്ത് കുടിവെള്ളം ലോറികളില് എത്തിച്ചു നല്കിയിരുന്നു. എന്നാല് പല പഞ്ചായത്തുകളിലും ഇതുവരെ കുടിവെള്ളവിതരണം ആരംഭിച്ചിട്ടില്ല. ചെറുകരക്കുന്ന് പദ്ധതിയെ മാത്രം ആശ്രയിച്ച് വേനല് കടത്തിവിടാന് കഴിയില്ലെന്നതിനാല് നഗരസഭയും പഞ്ചായത്തുകളും കുടിവെള്ള വിതരണം ഉടന് ആരംഭിക്കണമെന്നാണ് നാട്ടുകാരുടെ ആവശ്യം.
കുഴലുകള് പൊട്ടി ജലം പാഴാകുന്നതും വിതരണത്തെ കാര്യമായി ബാധിക്കുന്നുണ്ട്. ആയിരക്കണക്കിന് ലീറ്റര് ശുദ്ധജലമാണ് ദിനംപ്രതി നഷ്ടമാകുന്നത്. കുറിച്ചി, വാഴപ്പള്ളി, പായിപ്പാട്, തൃ ക്കൊടിത്താനം, മാടപ്പള്ളി പഞ്ചായത്തുകളിലും നഗരസഭ പരിധിയിലും അമ്പതിലേറെ ഇടങ്ങളിലാണ് കുഴല് പൊട്ടി ജലം പാഴാകുന്നത്. വാഴൂര് റോഡില് റയില്വേ സ്റ്റേഷനു സമീപത്ത് പൈപ്പ് പൊട്ടി വെള്ളം ഒഴുകാന് തുടങ്ങിയിട്ട് വര്ഷങ്ങള് പിന്നിട്ടു. ഈ ഭാഗത്തു മൂന്നു പദ്ധതികളിലായി പൈപ്പ് ലൈന് വലിക്കാന് രണ്ടു കോടി രൂപയ്ക്കടുത്ത് അനുവദിച്ചിട്ട് മാസങ്ങള് പിന്നിട്ടെങ്കിലും ജോലികള് ആരംഭിച്ചില്ല. ടെന്ഡര് നടപടികളിലെ താമസവും കരാര് ഏറ്റെടുക്കാന് ആളെ കിട്ടാത്തതുമാണു പ്രശ്നമായി വാട്ടര് അതോറിറ്റി ചൂണ്ടിക്കാട്ടുന്നത്. പാറേല്പള്ളി ഭാഗം, കുരിശുംമൂട്, പെരുമ്പനച്ചി, കവിയൂര് റോഡില് ഫാത്തിമാപുരം, ഇരൂപ്പാ, തൃക്കൊടിത്താനം തുടങ്ങിയ സ്ഥലങ്ങളിലും പൈപ്പു പൊട്ടി വെള്ളം പാഴാകുന്നുണ്ട്.
വാഴപ്പള്ളി, ഫാത്തിമാപുരം ഉള്പ്പെടെയുള്ള നഗരസഭാ പ്രദേശങ്ങളിലും പഞ്ചായത്തു പ്രദേശങ്ങളിലും കാലപ്പഴക്കം ചെന്ന പൈപ്പുകള് ഇടയ്ക്കിടെ പൊട്ടുകയാണ്. ആയിരം ലീറ്റര് വെള്ളത്തിനു 300 മുതല് 500 രൂപ വരെ വില കൊടുത്ത് വാങ്ങിയാണു പല കുടുംബങ്ങളും നിത്യോപയോഗം നടത്തുന്നത്.
