കൊട്ടാരക്കര: ബൈക്കിന്റെ പിന്നിലിരുന്ന് യാത്ര ചെയ്ത ആര്എസ്എസ് പ്രചാരകനെ ക്രൂരമായി മര്ദ്ദിച്ച് ലോക്കപ്പിലടച്ച പോലീസ് നടപടിയില് പ്രതിഷേധിച്ച് നൂറുകണക്കിന് പ്രവര്ത്തകര് പങ്കെടുത്ത പ്രകടനവും പ്രതിഷേധയോഗവും നടന്നു. ശാന്തി ജംഗ്ഷനില് നിന്നാരംഭിച്ച പ്രകടനം കച്ചേരിമുക്കില് പോലീസ് തടഞ്ഞു. തുടര്ന്ന് പ്രവര്ത്തകര് റോഡില് കുത്തിയിരുന്ന് പ്രതിഷേധിച്ചു.
യോഗം ജില്ലാസഹകാര്യവാഹക് അനില്കുമാര് ഉദ്ഘാടനം ചെയ്തു. പോലീസ് ആര്എസ്എസിന് നീതി നിഷേധിക്കുകയാണന്നും ബൈക്കിന്റെ പിന്നിലിരുന്ന് യാത്രചെയ്ത ആളിനെ ലോക്കപ്പിലടക്കുന്നത് ആദ്യ സംഭവമാണെന്നും അദ്ദേഹം പറഞ്ഞു. നീതി ലഭിക്കാന് കോടതിയെ സമീപിക്കുമെന്നും കൊട്ടാരക്കര എസ്ഐയുടെ ഏകപക്ഷീയമായ ആര്എസ്എസ് വേട്ടക്കെതിരെ ബഹുജനങ്ങളെ അണിനിരത്തി പ്രക്ഷോഭം സംഘടിപ്പിക്കുമെന്നും അനില് പറഞ്ഞു. പ്രചാരകനെ ലോക്കപ്പിലടച്ച സംഭവത്തില് പ്രതിഷേധം വ്യാപകമാകുകയാണ്.
വിവിധ സംഘടനകള് സംഭവത്തില് പ്രതിഷേധിച്ചു. ഇന്നലെ നടന്ന സംഭവങ്ങളെകുറിച്ച് അന്വേഷിക്കാന് ഐജി മനോജ് എബ്രഹാം കൊട്ടാരക്കരയില് വിശദമായ അന്വേഷണത്തിന് എസ്പിയുടേയും ഡിവൈഎസ്പിയുടേയും നേതൃത്വത്തില് 25 അംഗ സംഘത്തെ നിയോഗിച്ചതായി ഐജി പറഞ്ഞു. നിയമം കൈയ്യിലെടുക്കാന് ആരേയും അനുവദിക്കില്ല. ഇത്തരം സംഭവങ്ങള് മേലില് ആവര്ത്തിക്കാതിരിക്കാനുള്ള ശക്തമായ നടപടികള് പോലീസ് സ്വീകരിക്കുമെന്നും മാധ്യമപ്രവര്ത്തകരോട് അദ്ദേഹം പറഞ്ഞു. റൂറല് എസ്പി. എസ്.ശശികുമാറും ഒപ്പമുണ്ടായിരുന്നു.
