കുന്നത്തൂര്: ജനങ്ങളോട് പഞ്ചായത്ത് സമിതി അധികൃതര് വിവേചനം കാട്ടുന്നതില് പ്രതിഷേധിച്ച് കുന്നത്തൂര് പഞ്ചായത്ത് സെക്രട്ടറിയെ ബിജെപി പ്രവര്ത്തകര് ഉപരോധിച്ചു. കുന്നത്തൂര് പഞ്ചായത്തിലെ ഒന്നാം വാര്ഡിലെ ജനങ്ങളോടുള്ള അവഗണനയില് പ്രതിഷേധിച്ചായിരുന്നു പഞ്ചായത്തംഗം രേണുകയുടെ നേതൃത്വത്തില് ബിജെപി പ്രവര്ത്തകര് ഉപരോധ സമരം സംഘടിപ്പിച്ചത്.
എല്ഡിഎഫ് നേതൃത്വത്തിലുള്ള പഞ്ചായത്ത് ഭരണസമിതി ബിജെപി പഞ്ചായത്തംഗത്തിന്റെ ഒന്നാം വാര്ഡിനോട് കടുത്ത അവഗണനയും വിവേചനവുമാണ് പരിധി കടന്നത്. കടുത്ത വേനലില് കുടിവെള്ളം പോലും കിട്ടാതെ ജനങ്ങള് പരക്കം പായുമ്പോഴും പഞ്ചായത്ത് ഭരണസമിതി അത് കണ്ടില്ലെന്ന് നടിക്കുകയാണ്.
പൊതുടാപ്പ് വഴിയോ, ടാങ്കറുകളിലൂടെയോ വെള്ളമെത്തിക്കാന് അധികൃതര് തയാറാകുന്നില്ല. അതുപോലെ ഇവിടുത്തെ തെരുവുവിളക്കുകള് അറ്റകുറ്റ പണി നടത്താനും അധികൃതര് തയാറാകുന്നില്ല. എസ്സി സംവരണ വാര്ഡ് കൂടിയായിട്ടും ഇവിടുത്തുകാരോട് ഭരണസമിതി കാട്ടുന്നത് കടുത്ത അനാസ്ഥയാണ്. കേന്ദ്രസര്ക്കാരിന്റെ തൊഴില് നൈപൂണ്യപദ്ധതിയില് ഈ വാര്ഡിലെ ഒറ്റയൊരാളെ പോലും ഉള്പ്പെടുത്താന് പഞ്ചായത്ത് ഭരണസമിതി തയാറായില്ല. മിക്ക ആനുകൂല്യങ്ങളും സ്വന്തം വാര്ഡുകളിലേക്ക് കൊണ്ടുപോകുകയാണ് ഇടത്-ഭരണസമിതി ചെയ്യുന്നത്.
കഴിഞ്ഞ കുറെ ദിവസങ്ങളായി ഒന്നാംവാര്ഡില് പഞ്ചായത്തംഗം രേണുകയുടെ സ്വന്തം ചെലവിലാണ് ടാങ്കറുകളില് കുടിവെള്ളമെത്തിക്കുന്നത്. രാവിലെ 11 മണിയോടെ ആരംഭിച്ച ഉപരോധ സമരം ഒരുമണിവരെ നീണ്ടു. വാര്ഡിനോടുള്ള അവഗണന അവസാനിപ്പിക്കാമെന്നുള്ള പഞ്ചായത്ത് സെക്രട്ടറിയുടെ ഉറപ്പിന്മേലാണ് സമരം അവസാനിപ്പിച്ചത്. ഉപരോധ സമരത്തിന് ബിജെപി കുന്നത്തൂര് മണ്ഡലം ജനറല് സെക്രട്ടറിമാരായ ദിനചന്ദ്രന്, പി.എന്.മുരളീധരന്പിള്ള, സെക്രട്ടറി റ്റി.ഷീജ, ബിഎംഎസ് താലൂക്ക് സെക്രട്ടറി കിടങ്ങയം സോമന്, ആര്എസ്എസ് മണ്ഡല് കാര്യവാഹ് മനോജ്, പഞ്ചായത്ത് ജനറല് സെക്രട്ടറി ടി.പ്രദീപ്കുമാര്, രതീഷ്, കെ.ഉദയന്, രാജേന്ദ്രന്, സി.ലത തുടങ്ങിയവര് നേതൃത്വം നല്കി.
