കായംകുളം: ഉദാത്തമായ ദര്ശനങ്ങളുടെ വഴികാട്ടിയായ ഹിന്ദുസംസ്ക്കാരം ലോകത്തിന് മാതൃകയാണെന്ന് പി.എം.എ. സലാം മുസ്ലിയാര് പറഞ്ഞു. ഭാരതീയ വിചാരകേന്ദ്രത്തിന്റെ നേതൃത്വത്തില് കായംകുളത്ത് സംഘടിപ്പിച്ച ഓപ്പണ് ഫോറത്തില് മുഖ്യപ്രഭാഷണം നടത്തുകയായിരുന്നു അദ്ദേഹം.
എല്ലാവരുടെയും ആചാരനുഷ്ഠാനങ്ങളെ അംഗീകരിക്കുന്ന മാനവ മൈത്രിയുടെ സങ്കേതമാണ് ഭാരതം. ഖുറാനും ബൈബിളിനും മുന്പ് ഭാരതത്തില് ഹിന്ദുപുണ്യ പുരാണങ്ങളും വേദാന്തങ്ങളും നിലനിന്നിരുന്നു. എല്ലാവര്ക്കും സ്വതന്ത്രമായി ജീവിക്കാന് പറ്റിയ ഭാരതത്തെ ശിഥിലമാക്കി കൊണ്ടിരിക്കുന്നത് കമ്മ്യൂണിസമാണ്. കോണ്ഗ്രസ് അവര്ക്ക് ഒത്താശ ചെയ്യുന്നു. അഫ്സല് ഗുരുവിനെ പോലുള്ളവരല്ല ഭാരതത്തിന് മാതൃക ആകേണ്ടത്. തീവ്രവാദത്തിനും അക്രമത്തിനും മുതിരുന്നവര് ഭാരത മാതാവിനെ നിന്ദിക്കുന്നവരാണ്. മതതീവ്രവാദത്തിന്റെ പേരിലാണ് ഇപ്പോള് ധ്രുവീകരണം നടക്കുന്നത്. സ്വന്തം അമ്മയെ ഇഷ്ടപ്പെടുന്നവര്ക്കെ ഭാരത മാതാവിനെ ഇഷ്ടപ്പെടാന് സാധിക്കൂ.
രാഷ്ട്രത്തിന്റെ നന്മയും രക്ഷയും ഉന്നത മൂല്യങ്ങളും കാത്തു സൂക്ഷിക്കുന്ന നരേന്ദ്രമോദി സര്ക്കാരിനെ പിന്നില് നിന്നും കുത്തുന്ന ഇടതു വലതു രാഷ്ട്രീയ പാര്ട്ടികളുടെ ജനവഞ്ചന വരുന്ന നിയമസഭാ തെരഞ്ഞെടുപ്പോടുകൂടി അവസാനിക്കും.
കേരളത്തില് ബിജെപി ഒരു വലിയ ശക്തിയാകും. മോദി സര്ക്കാരിന്റെ സത് ഭരണത്തില് എല്ലാമേഖലയിലും ഉയര്ച്ചയാണ്. കേന്ദ്രസര്ക്കാരിന്റെ ഭാഗത്തുനിന്നും ഗുണകരമായ കാര്യങ്ങള് ലഭിക്കുമ്പോള് ആ ഭരണത്തെ സഹായിക്കാന് ക്രിസ്ത്യന്, മുസ്ലീം പണ്ഡിതന്മാര് തയ്യാറാകണം. ആര്എസ്എസ് മുസ്ലീം വിരോധികളല്ലെന്നും ദേശ സ്നേഹമുള്ളവരുടെ പ്രസ്ഥാനമാണെന്നും ആര്എസ്എസ് ഒരു മതത്തെയും മോശമായി ചിത്രീകരിക്കുന്നില്ലെന്നും അദ്ദേഹം പറഞ്ഞു.
