കുന്നത്തൂര്: പ്രവര്ത്തകരുടെ മദ്യപാനവും അസഭ്യവര്ഷവും ചോദ്യം ചെയ്ത വീട്ടമ്മയുടെ വീട്, രാത്രി തല്ലിതകര്ത്ത കേസില് രണ്ട് സിപിഎം പ്രവര്ത്തകരെ ശാസ്താംകോട്ട പോലീസ് അറസ്റ്റ് ചെയ്തു.
കഴിഞ്ഞ മാസമാണ് മൈനാഗപ്പള്ളി പീസ് കോട്ടേജില് ഷൈമോളുടെ വീട് ഒരുസംഘം സിപിഎം ഗുണ്ടകള് തല്ലിതകര്ത്തത്. മതില് പൊളിച്ച് അകത്ത് കടന്ന സംഘം കതകും ജനലുകളും തല്ലിതകര്ക്കുകയും ഗൃഹോപകരണങ്ങള് പൂര്ണ്ണമായും നശിപ്പിക്കുകയും ചെയ്തിരുന്നു. പ്രദേശത്തെ ക്രിമിനലുകളായ പത്തോളം സിപിഎം പ്രവര്ത്തകരായിരുന്നു ഇതിന് പിന്നില്. പരാതി നല്കിയിട്ടും രാഷ്ട്രീയ സമ്മര്ദ്ദഫലമായി പ്രതികളെ അറസ്റ്റ് ചെയ്യാന് പോലീസ് മടിക്കുകയായിരുന്നു. മൈനാഗപ്പള്ളി കടപ്പത്തോട്ടത്തില് പടിഞ്ഞാറ്റതില് അരുണ് ഡാനിയല്(25), കടപ്പ റബ്ബര് തോട്ടത്തില് വീട്ടില് സാബു(26) എന്നിവരെയാണ് കഴിഞ്ഞ ദിവസം രാത്രി രണ്ടിനോടെ മൈനാഗപ്പള്ളിയില് നിന്നും ശാസ്താംകോട്ട പോലീസ് അറസ്റ്റ് ചെയ്തത്. ഇവരെ കേസില് നിന്ന് ഒഴിവാക്കാനായി രാവിലെ മുതല് തന്നെ സിപിഎം നേതാക്കള് സ്റ്റേഷനില് കയറിയിറങ്ങുകയായിരുന്നു. കോടതിയില് ഹാജരാക്കിയ ഇവരെ റിമാന്റു ചെയ്തു. ഇനിയും എട്ടോളം സിപിഎം നേതാക്കള് ഈ പിടിയിലാവാനുണ്ട്. ഇവര് എല്ലാം തന്നെ സ്ഥലത്തുണ്ടെങ്കിലും സിപിഎമ്മിന്റെ സമ്മര്ദ്ദഫലമായി അറസ്റ്റ് ചെയ്യുന്നില്ല.
