എടത്വാ: എടത്വായിലെ ട്രഷറി നിര്മാണം അനിശ്ചിതത്ത്വത്തിലായി. എടത്വാ കെഎസ്ആര്ടിസി ഡിപ്പോയ്ക്ക് എതിര്വശം ട്രഷറി നിര്മിക്കാനുള്ള സ്ഥലം എടത്വാ സെന്റ് ജോര്ജ് ഫെറോന പള്ളിയും സര്ക്കാരും സംയുക്തമായി നല്കിയെങ്കിലും വസ്തു തര്ക്കത്തെത്തുടര്ന്നു നിര്മാണം നിലച്ചു.
ട്രഷറി സ്ഥാപിക്കാനായി കണ്ടെത്തിയ സ്ഥലം സമീപ വാസിയുടെ സ്വന്തമാണെന്ന് കാണിച്ച് ആലപ്പുഴ മുനിസിഫ് കോടതിയില് പരാതി നല്കി.ഇതേത്തുടര്ന്ന് കോടതി കമ്മിഷനെ നിയോഗിച്ചെങ്കിലും റവന്യു വകുപ്പില് തെളിയിക്കാന് രേഖകള് ഇല്ലാതെ വന്നതോടെ ട്രഷറി നിര്മാണം തുടരാന് സാധിച്ചില്ല.
2007-08 സാമ്പത്തിക വര്ഷത്തിലാണ് ട്രഷറി നിര്മാണത്തിനുള്ള അനുമതി ലഭിച്ചത്. സ്ഥലം നികത്തി കെട്ടിടം പണിയാന് 48 ലക്ഷം രൂപ അനുവദിച്ചിരുന്നു. സ്ഥലം സര്ക്കാരിന്റെ ആണെന്ന് തെളിയിക്കാന് പിഡബ്ല്യുഡിയുടെ പക്കല് രേഖകള് ഇല്ലാത്തത് കാരണം ആദ്യ കോടതിവിധി സ്ഥലം ഉടമക്ക് അനുകൂലമായി. അപ്പീല് നല്കി കേസ് വിസ്താരം തുടരുകയാണ്.
സ്ഥലത്തിന്റെ അവകാശ തര്ക്കം നിലനില്ക്കുമ്പോഴും ട്രഷറിയുടെ ആസ്ഥാന മന്ദിരത്തിനുവേണ്ടി പെന്ഷന്കാര് നെട്ടോട്ടത്തിലാണ്. നിലവില് എടത്വാ ജങ്ഷന് സമീപത്തെ രണ്ടുനില കെട്ടിടത്തിലാണ് ട്രഷറി പ്രവര്ത്തിക്കുന്നത്.
ഈ ട്രഷറിയില് നിന്ന് മണിയോര്ഡര് പെന്ഷന് ഉള്പെടെ 893 പേര്ക്ക് പെന്ഷന് വിതരണം നടത്തുന്നുണ്ട്. പ്രായാധിക്യത്താല് പലരും പടികള് കയറാന് ബുദ്ധിമുട്ട് അനുഭവിക്കുകയാണ്.
