കോട്ടയം: വേനല്കടുത്തതോടെ തീപടര്ന്ന് പിടിക്കുന്നത് വ്യാപകമാകുന്നു. നഗരസമീപപ്രദേശങ്ങളില് ഇന്നലെ നാലിടത്താണ് ഏതാണ്ട് ഒരേസമയം അഗ്നിബാധയുണ്ടായത്. നഗരത്തില് ഫയര്ഫോഴ്സ് സംഘം ദിവസംമുഴുവന് പരിശ്രമിച്ചാണ് തീനിയന്ത്രണവിധേയമാക്കിയത്.
മണര്കാടടുത്ത് കോട്ടപ്പടിയില് രണ്ടേക്കര് തരിശുപുരയിടത്തിലും പൊന്പള്ളപള്ളിക്ക് സമീപം തേക്കുങ്കല് റബ്ബര് എസ്റ്റേറ്റിലും അമയന്നൂരില് രണ്ടേക്കര് റബ്ബര്തോട്ടത്തിലും ഇന്നലെ തീപടര്ന്നുപിടിച്ചു. പാലായ്ക്ക് സമീപം ചേര്പ്പുങ്കലില് തരിശ്കിടന്ന പാടശേഖരത്തിലും പടര്ന്ന തീകെടുത്തുന്നതിന് കോട്ടയത്തുനിന്നുള്ള ഫയര്ഫോഴ്സ് സംഘമാണെത്തിയത്. എല്ലാദിവസവും ചെറുതും വലുതുമായ അഗ്നിബാധയുണ്ടാവുന്നുണ്ട്. ജില്ലയിലെ ഫയര്ഫോഴ്സ് വിഭാഗത്തിന്റെ സമയോചിതമായ ഇടപെടലുകള്കൊണ്ടാണ് അനിഷ്ടസംഭവങ്ങള് ഉണ്ടാവാത്തത്.
എന്നാല് കോട്ടയം നഗരത്തിലെ ഫയര്സ്റ്റേഷനില് ഏതാനും ദിവസമായി വെള്ളംലഭിക്കുന്നില്ല. വാട്ടര്അതോറിറ്റിയാണ് ഫയര്സ്റ്റേഷനില് വെള്ളം നല്കിയിരുന്നത്. പൈപ്പ് ലൈനില് അറ്റകുറ്റപ്പണി നടക്കുന്നു എന്ന ന്യായം പറഞ്ഞാണ് ഫയര്സ്റ്റേഷനിലേക്കുള്ള വെള്ളം വാട്ടര് അതോറിറ്റി മുടക്കിയിരിക്കുന്നത്. സ്ഥിരമായി അഗ്നിബാധ ഉണ്ടാവുന്നസമയത്ത് വെള്ളംലഭിക്കാത്തത് ഫയര്ഫോഴ്സ് ഉദ്യോഗസ്ഥര്ക്ക് വലിയ ബുദ്ധിമുട്ടുകളുണ്ടാക്കുന്നു. സ്വകാര്യ ഏജന്സികള് നേരത്തെ ഫയര്ഫോഴ്സിന് വെള്ളംനല്കിയിരുന്നെങ്കിലും ഇപ്പോള് അവരും വെള്ളംനല്കുന്നില്ലായെന്ന് ഫയര്ഫോഴ്സ് ഉദ്യോഗസ്ഥര് പറയുന്നു. വെസ്റ്റ് പോലീസ് സ്റ്റേഷന് സമീപം കൊടൂരാറ്റില് നിന്ന് ഫ്ളോട്ട് പമ്പ് ഉപയോഗിച്ചാണ് ഫയര്എന്ജിന് ടാങ്കുകളില് ഇപ്പോള് വെള്ളംനിറയ്ക്കുന്നത്.
