ചേമഞ്ചേരി: തീരദേശ മേഖലയില് നടപ്പാക്കേണ്ട ശുദ്ധജലവിതരണ പദ്ധതി അട്ടിമറിച്ചതായി പരാതി. ചേമഞ്ചേരി ഗ്രാമപഞ്ചായത്ത് നെടുവയല്ക്കുനി ശുദ്ധജല വിതരണപദ്ധതിയാണ് വിവാദമായിരിക്കുന്നത്. കടലോരമേഖലയില് ശുദ്ധജലവിതരണത്തിനായി കേരള സംസ്ഥാന തീരദേശ വികസന കോര്പ്പറേഷന് അനുവദിച്ച പദ്ധതിയാണ് തീരദേശമല്ലാത്ത നെടുവയല് കുനിയില് നടപ്പിലാക്കിയതെന്നാണ് പരാതി.
ഉപഭോക്താക്കളില് നിന്നും അനധികൃതമായി പണം പിരിച്ചതായും കടലോര ഗ്രാമങ്ങളെ ഒഴിവാക്കി മറ്റൊരു സ്ഥലത്ത് പദ്ധതി നടപ്പിലാക്കിയതു വഴി തീരമേഖലയെ വഞ്ചിച്ചിരിക്കുകയാണെന്നും ഭാരതീയ മത്സ്യപ്രവര്ത്തകസംഘം തീരദേശവികസന കോര്പ്പറേഷന് പരാതി നല്കി.
37 ലക്ഷം രൂപയാണ് തീരദേശവികസന കോര്പ്പറേഷന് ശുദ്ധജല വിതരണ പദ്ധതിക്കായി അനുവദിച്ചത്. രണ്ടര ലക്ഷം രൂപ ചേമഞ്ചേരി പഞ്ചായത്തും അനുവദിച്ചിട്ടുണ്ട്. കോരപ്പുഴ, കണ്ണംകടവ്, കാപ്പാട്, തൂവപ്പാറ തുടങ്ങിയ കടലോര ഗ്രാമങ്ങള് കടുത്ത ജലക്ഷാമം അനുഭവിക്കുമ്പോഴാണ് പദ്ധതി മറ്റൊരു സ്ഥലത്ത് അനുവദിച്ചതെന്നാണ് മത്സ്യതൊഴിലാളികള് ആരോപിക്കുന്നത്.
എന്നാല് ചേമഞ്ചേരി പഞ്ചായത്ത് തീരദേശ പഞ്ചായത്തില് ഉള്പ്പെട്ടതാണെന്നും പഞ്ചായത്തില് എവിടെയും പദ്ധതി നടപ്പിലാക്കുന്നതില് തെറ്റില്ലെന്നുമാണ് പഞ്ചായത്ത് അധികൃതരുടെ വിശദീകരണം. പദ്ധതി തടസ്സപ്പെടുത്താനുള്ള ശ്രമമാണ് നടക്കുന്നതെന്ന് പഞ്ചായത്ത് പ്രസിഡന്റ് അശോകന് കോട്ട് ആരോപിച്ചു.
എന്നാല് തീരദേശ ഗ്രാമങ്ങള്ക്ക് അനുവദിച്ച തുകയാണ് വകമാറ്റി ചെലവഴിച്ചതെന്നും ഗുണഭോക്ത കമ്മിറ്റിക്ക് നിയമപരമായി നിലനില്പ്പില്ലെന്നും മത്സ്യപ്രവര്ത്തക സംഘം ആരോപിച്ചു.
5,000 മുതല് 9,000 രൂപ വരെ പിരിച്ചതായി പരാതിയുണ്ട്. പദ്ധതി നടത്തിപ്പിനായി വാര്ഡ് തലത്തില് ജനകീയ കമ്മിറ്റി രൂപീകരിക്കാന് കെഎസ് സി എഡിസി നിര്ദ്ദേശം നല്കിയിട്ടില്ലെന്നും പദ്ധതി നിര്മ്മാണത്തിന് മറ്റാരെയും ചുമതലയേല്പ്പിച്ചിട്ടില്ലെന്നും വിവരാവകാശ പ്രകാരം നല്കിയ രേഖയില് കോര്പ്പറേഷന് വ്യക്തമാക്കുന്നുണ്ട്.
പദ്ധതി നിര്വ്വഹണം പൂര്ത്തീകരിച്ച് ചേമഞ്ചേരി ഗ്രാമപഞ്ചായത്തിന് കൈമാറുമെന്നും തുടര്നടത്തിപ്പ് പരിപാലനവും പഞ്ചായത്തിന്റെ ചുമതലയാണെന്നും കോര്പ്പറേഷന് വ്യക്തമാക്കുന്നു. തീരദേശ മേഖലയിലെ പഞ്ചായത്തംഗങ്ങളുടെ പരാജയമാണ് പദ്ധതി സ്ഥലം മാറ്റി നടപ്പിലാക്കുന്നോതേടെ തെളിഞ്ഞിരിക്കുന്നതെന്ന് മത്സ്യപ്രവര്ത്തക സംഘം സംസ്ഥാന വൈസ് പ്രസിഡന്റ് എന്.പി. രാധാകൃഷ്ണന്, സംസ്ഥാന സെക്രട്ടറി ഉദയഘോഷും ആരോപിച്ചു
