കൊട്ടാരക്കര: സപ്താഹവേദികള് നാടകശാലകളല്ല അത് ഹിന്ദുവിനെ നേര്വഴിക്ക് നയിക്കാനുള്ള ജ്ഞാനവേദികളാണന്ന് പ്രഖ്യാപിച്ച് ഇന്നും സപ്താഹ, നവാഹ വേദികളെ ജ്ഞാനവേദികളായി നിലനിര്ത്തുന്ന ആചാര്യന് പറക്കോട് എന്.വി.നമ്പ്യാതിരിക്ക് ഗണപതിക്ഷേത്ര ഉപദേശകസമിതിയുടെ ആദരം.
തുടര്ച്ചയായി ഇരുപത്തിഒന്നാം വര്ഷവും ആചാര്യസ്ഥാനം അലങ്കരിച്ച് സനാതനധര്മ്മം പ്രചരിപ്പിച്ചതിനാണ് ആദരവ് സമ്മാനിക്കുന്നത്. നമ്പ്യാതിരിയുടെ യജ്ഞവേദിയിലേക്കുള്ള കാല്വെയ്പും, സര്വ്വവിഘ്നനിവാരകന്റെ തിരുനടയില് യജ്ഞത്തിന്റെ തുടക്കവും ഒരേസമയം ആയിരുന്നുവെന്നതും ശ്രദ്ധേയമാണ്. രാമായണത്തെ ജനകീയവല്കരിക്കാനും സമൂഹത്തില് രാമനാമത്തിന്റെ മാഹാത്മ്യം പ്രചരിപ്പിക്കാനുമുള്ള വിശാലഹിന്ദുസമ്മേളനത്തിന്റെ ആഹ്വാനത്തില് നിന്ന് പ്രചോദനമുള്കൊണ്ടാണ് 1996ല് മഹാഗണപതിക്ഷേത്രത്തില് രാമായണ നവാഹയജ്ഞത്തിന് തുടക്കം കുറിക്കുന്നത്.
സപ്താഹങ്ങള് അപൂവമായിരുന്ന കാലത്ത് ആചാര്യനെ തേടിയുള്ള യാത്ര ചെന്നെത്തിയത് ആഗമാനന്ദസ്വാമികളുടെ ശിഷ്യനും അധ്യാപകനും എഴുത്തുകാരനുമായ പറക്കോട് എന്.വി.നമ്പ്യാതിരിയിലാണ്. അതുവരെ കുട്ടികള്ക്ക് ജ്ഞാനോപദേശം നല്കിയിരുന്ന നമ്പ്യാതിരി അങ്ങനെ തന്റെ ആദ്ധ്യാത്മിക തീര്ത്ഥയാത്രക്ക് തുടക്കം കുറിച്ചു. 1500 ലധികം ക്ഷേത്രവേദികളിലും അതിലും ഇരട്ടി മറ്റ് വേദികളിലും അദ്ദേഹം തന്റെ ജ്ഞാനം പകര്ന്ന് നല്കി യാത്ര തുടരുകയാണ്.
ഉണ്ണിയൂട്ട്, രുഗ്മിണിസ്വയംവരം, കുചേലാഗമനം, കഥകളി തുടങ്ങി സപ്താഹവേദികളില് എന്തെല്ലാം പാടില്ല എന്നുണ്ടോ, അതെല്ലാം അവതരിപ്പിക്കുന്ന ആചാര്യന്മാര് എന്നവകാശപെടുന്നവര്ക്ക് മാതൃകയാണ് ഇദ്ദേഹത്തിന്റെ യജ്ഞവേദികള്. ഇവിടെയെത്തുന്നവര് ബുക്കും പേനയുമായാണ് എത്തുന്നത്. സംശയനിവര്ത്തി വരുത്തി കാലുഷ്യങ്ങള് ഒഴിഞ്ഞ് സ്വച്ഛമനസോടെ മടങ്ങുന്നു. ധാരാളം ശിഷ്യസമ്പത്തിന് ഉടമയുമാണ്. ശ്രീരാമകൃഷ്ണപരമഹംസര്,ശ്രീശങ്കരാചാര്യര്, ഇതിഹാസകഥകള്, ആശ്ചര്യചൂഢാമണി വ്യാഖ്യാനം, ശ്രീമദ് ദേവീഭാഗവതം വ്യാഖ്യാനം, ശ്രീമദ്’ഭാഗവതപ്രവേശിക എന്നിവ അദ്ദേഹത്തിന്റെ കൃതികളാണ്. ഭാഗവതത്തിലെ ഏത് വിഷയത്തെപറ്റിയും കാലഘട്ടത്തിന് ഇണങ്ങുന്ന തരത്തിലുള്ള വ്യാഖ്യാനമാണ് പ്രത്യേകത.
മറ്റുള്ളവരുടെ അഭിപ്രായത്തിന് പിറകെ പോകാതെ വാമനാവതാരം തുടങ്ങി ഓണത്തെ പറ്റിയുള്ള തെറ്റായ ചിന്താഗതി എന്നിവയില് വ്യക്തവും സുദൃഢവുമായ നിര്വചനമാണ് അദ്ദേഹത്തിനുള്ളത്. വിഷയത്തെപറ്റി ഇത്രയേറെ പഠിച്ച് അവതരിപ്പിക്കുന്ന ആചാര്യന്മാര് വിരളമാണന്ന് തന്നെ പറയാം. ആചാര്യന് എന്ന വാക്കിനോട് പൂര്ണ്ണമായും നീതിപുലര്ത്തി 96 ല് ആരംഭിച്ച തന്റെ സപര്യ 85-ാം വയസിലും യുവത്വത്തിന്റെ പ്രസരിപ്പോടെ തുടരുകയാണ് ഏഴംകുളം പറക്കോട് ഗീതാഭവനത്തിലെ സംസ്കൃതാധ്യാപകനാണ് ഈ ആചാര്യന്. സത്രത്തിന്റെ സമാപനദിനമായ ഇന്ന് ഉപദേശകസമിതി പ്രസിഡന്റ് ആര്.ദിവാകരന് മുന്ചീഫ് സെക്രട്ടറി ആര്.രാമചന്ദ്രന് എന്നിവര് ചേര്ന്ന് അദ്ദേഹത്തെ ആദരിക്കും. ക്ഷേത്രം തന്ത്രി തരണനല്ലൂര് പരമേശ്വരന് നമ്പൂതിരിപ്പാട് വിശിഷ്ടാതിഥിയായിരിക്കും.
