തിരുവനന്തപുരം: ടിടിഇയെ മര്ദ്ദിച്ച റെയില്വെ ജീവനക്കാരനെതിരെ നടപടിയെടുക്കാത്തതിനെ തുടര്ന്ന് തിരുവനന്തപുരം സെന്ട്രല് റെയില്വെ സ്റ്റേഷനിലെ ജീവനക്കാര് മിന്നല് പണിമുടക്ക് നടത്തി. ടിക്കറ്റ് നല്കാതെ കൗണ്ടറുകള് അടച്ചിട്ട് നടത്തിയ പ്രതിഷേധത്തില് യാത്രക്കാര് വലഞ്ഞു. ജീവനക്കാരുടെ സമരം മറ്റ് സ്റ്റേഷനുകളിലേക്ക് വ്യാപിക്കുമെന്നായതോടെ കുറ്റാരോപിതനായ ജീവനക്കാരനെ സസ്പെന്റു ചെയ്തു.
കഴിഞ്ഞ ദിവസം തിരുവനന്തപുരത്തു നിന്നും യാത്ര തിരിച്ച സമ്പര്ക്ക്ക്രാന്തി എക്സ്പ്രസ് ടെയിനിലെ ടിടിഇ ജയകുമാറിനെയാണ് കണ്ണൂര് റെയില്വെ സ്റ്റേഷനില് വച്ച് റെയില്വെ സീനിയര് സെക്ഷന് എഞ്ചിനീയര് പ്രവീണ് മര്ദ്ദിച്ചത്. വിശ്രമ മുറിയുമായി ബന്ധപ്പെട്ട വാക്ക് തര്ക്കമാണ് സംഘട്ടനത്തിലേക്കു നയിച്ചത്. ട്രെയിന് കണ്ണൂര് സ്റ്റേഷനില് എത്തിയതോടെ ടിടിഇ ജയകുമാറിന്റെ ഡ്യൂട്ടി ഷിഫ്റ്റ് കഴിഞ്ഞിരുന്നു. പിറ്റേ ദിവസം തിരികെ വരുന്ന ട്രെയിനിലാണ് അടുത്ത ഡ്യൂട്ടി. രാത്രിയില് ഡ്യൂട്ടി തീരുന്ന ടിടിഇ മാര്ക്ക് റെസ്റ്റ് റൂമില് വിശ്രമിക്കാന് റെയില്വെ അനുമതി നല്കിയിട്ടുണ്ട്. ഒരു ബെഡ്ഡും ഇവര്ക്കായി നല്കിയിട്ടുണ്ട്. റെസ്റ്റ് റൂമില് കയറിയ ജയകുമാറിനോട് അവിടെ നിന്നും മാറാന് റൂമിന്റെ ചുമതലയുള്ള പ്രവീണ് ആവശ്യപ്പെട്ടു. പുറത്ത് പോകാതെ നിന്ന ജയകുമാറിനെ ക്രൂരമായി മര്ദ്ദിച്ചതായി പ്രതിഷേധക്കാര് ആരോപിച്ചു. മര്ദ്ദനത്തില് ജയകുമാറിന്റെ മുഖത്തിന് പരിക്കേറ്റ് കണ്ണൂരിലെ സ്വകാര്യ ആശുപത്രിയില് ചികിത്സയിലാണ്.
പോലീസ് കേസ് എടുത്തിട്ടും പ്രവീണിനെതിരെ നടപടിയെടുക്കാന് പാലക്കാട് റെയില്വെ ഡിവിഷന് തയ്യാറായില്ല. തുടര്ന്നായിരുന്നു തിരുവനന്തപുരം സെന്ട്രല് റെയില്വെസ്റ്റേഷനിലെ ജീവനക്കാര് പണിമുടക്കിയത്. രാവിലെ 11 ഓടെ ടിക്കറ്റ് വിതരണം നിറുത്തിവച്ച് കൗണ്ടറുകള് അടച്ചിട്ടു. ഇതോടെ യാത്രക്കാര് വലഞ്ഞു. യാത്രക്കാര് സംഘടിച്ചതോടെ ഉന്നത ഉദ്യോഗസ്ഥരെത്തി ചര്ച്ച നടത്തി ഒരു മണിക്കൂറിനു ശേഷം ടിക്കറ്റ് വിതരണം പുനസ്ഥാപിച്ചു. ജീവനക്കാരനെതിരെ നടപടിയെടുക്കാമെന്ന് ഉറപ്പ് നല്കിയെങ്കിലും പ്രതിഷേധക്കാര് പിന്തിരിയാതെ സ്റ്റേഷന് മാസ്റ്റര് ഓഫീസ് ഉപരോധം തുടര്ന്നു. അറിയിപ്പുകള് നിറുത്തിവച്ച് എല്ലാ വിഭാഗത്തിലെയും ജീവനക്കാര് പ്രതിഷേധത്തില് പങ്കു ചേര്ന്നതോടെ പാലക്കാട് ഡിവിഷണല് മാനേജരുമായി തിരുവനന്തപുരം ഡിവിഷന് റെയില്വെ മാനേജര് ചര്ച്ച നടത്തി പ്രവീണിനെ സസ്പെന്റു ചെയ്തതോടെ ഉപരോധം അവാസാനിച്ചു.
ജീവനക്കാരുടെ മിന്നല് പണിമുടക്കിനെ തുടര്ന്ന് തമ്പാനൂര് റെയില്വേയില് സ്റ്റേഷനിലെ ടിക്കറ്റ്
കൗണ്ടറുകള് അടച്ചിട്ടതിനെതിരെ പ്രതിഷേധിക്കുന്ന യാത്രക്കാര്
