കൊല്ലം: റോഡ് വീതികൂട്ടാന് പൊതുമരാമത്ത് ഉദേ്യാഗസ്ഥരും പോലീസും ചേര്ന്ന് പൊളിച്ച സ്വകാര്യഭൂമിയിലെ മതില് രണ്ട് മാസത്തിനകം പുനര്നിര്മ്മിച്ചു നല്കണമെന്ന് സംസ്ഥാന മനുഷ്യാവകാശ കമ്മീഷന് അംഗം കെ. മോഹന്കുമാര് ഉത്തരവിട്ടു.
പൊതുമരാമത്ത് വകുപ്പ് എക്സിക്യൂട്ടീവ് എഞ്ചിനീയര് മതില് പുനര്നിര്മ്മിച്ച് നല്കണമെന്ന് ഉത്തരവില് പറയുന്നു. ഉത്തരവ് ചീഫ് സെക്രട്ടറിക്കും പൊതുമരാമത്ത് സെക്രട്ടറിക്കും ചീഫ് എഞ്ചിനീയര്ക്കും കൈമാറി. മതില് പുനര്നിര്മ്മിച്ച ശേഷം മൂന്നു മാസത്തിനകം പൊതുമരാമത്ത് നിരത്ത് വിഭാഗം നടപടി റിപ്പോര്ട്ട് ഫയല് ചെയ്യണമെന്നും ഉത്തരവില് പറയുന്നു.
മൈനാഗപ്പള്ളി കടപ്പായില് മൃദുലാ കബീര് സമര്പ്പിച്ച പരാതിയിലാണ് നടപടി. പരാതിക്കാരി ഭര്ത്താവ് മരിച്ച് ദയനീയാവസ്ഥയിലാണ്. പരാതിക്കാരിയുടെ അറിവോടെയാണ് മതില് പൊളിച്ചതെന്ന പൊതുമരാമത്ത് വകുപ്പിന്റെ വാദം തെളിവുകളുടെ പിന്ബലമില്ലാത്തതിനാല് കമ്മീഷന് തള്ളി. കമ്മീഷന്റെ നിര്ദ്ദേശാനുസരണം പൊതുമരാമത്ത് വകുപ്പ് ഉദേ്യാഗസ്ഥരുടെ സാന്നിദ്ധ്യത്തില് റവന്യൂ വകുപ്പ് ഭൂമി അളന്ന് തിട്ടപ്പെടുത്തിയപ്പോഴാണ് സര്ക്കാര് ഏജന്സികള് നടത്തിയ നിയമലംഘനം മനസിലായത്. കൈയ്യേറ്റം ഒഴിപ്പിക്കല്, സ്വകാര്യഭൂമി ഏറ്റെടുക്കല് മുതലായ സാഹചര്യങ്ങളില് സര്ക്കാര് വകുപ്പുകള് സ്വീകരിക്കുന്ന കീഴ്വഴക്കങ്ങളും നടപടിക്രമങ്ങളും ഇവിടെ പാലിച്ചതായി കാണുന്നില്ലെന്ന് കമ്മീഷന് കണ്ടെത്തി.
തര്ക്ക പ്രദേശത്തിന്റെ ഉടമസ്ഥത സംബന്ധിച്ച് നിയമാനുസരണം വ്യക്തത വരുത്താതെ പരാതിക്കാരിയുടെ മതില് പൊളിച്ചുമാറ്റിയത് അധികാര ദുര്വിനിയോഗമാണെന്ന് കെ.മോഹന്കുമാര് ഉത്തരവില് പറഞ്ഞു.
മതില്തകര്ത്തതു കാരണം പരാതിക്കാരിയുടെ കുടുംബജീവിതം അപകടാവസ്ഥയിലായി. ഇവരുടെ പരാതി അനന്തമായി നീട്ടുന്നത് മനുഷ്യാവകാശ ലംഘനമാണെന്നും മനുഷ്യാവകാശകമ്മീഷന് നിരീക്ഷിച്ചു.
