പുകവലി കാന്സറിന് വഴിതെളിക്കും എന്ന് കൊച്ചുകുട്ടികള്ക്കു വരെ അറിയാം. എന്നിട്ടും സിഗരറ്റ് വലി നിര്ത്തുന്നില്ല. പക്ഷേ,കാന്സര് പിടിപെടുമ്പോള് ബോധമുണരും. ബോധമുണരുമ്പോള് തെറ്റില് നിന്ന് പിന്തിരിയാന് ശ്രമിക്കും. പിന്നെ ആഗ്രഹമുണ്ടെങ്കിലും സിഗരറ്റു വലിക്കില്ല. വലിച്ചാല് മരിക്കുമെന്ന ബോധം ഉണരുന്നു. അതിനാലാണ് അമ്മ പറയുന്നത്, ബോധമില്ലാത്തതുകൊണ്ടാണ് നമ്മള് തെറ്റുകള് ചെയ്യുന്നതെന്ന്.
ഒരു മോഷ്ടാവ് ഒരിക്കല് ഒരു മഹാത്മാവിനെ വണങ്ങി പറഞ്ഞു. ഗുരോ, എന്റെ ജോലി മോഷണമാണ്. ഈ തെറ്റില് നിന്ന് മോചിതനാകണമെന്ന് ആഗ്രഹമുണ്ട് അതിന് അങ്ങ് എന്നെ സഹായിക്കണം.’
മഹാത്മാവ് ഉടന് മറുപടി കൊടുത്തു. നിനക്ക് മോഷണം നിര്ത്താനാകുന്നില്ലെങ്കില് നീ മോഷ്ടിച്ചതിനുശേഷം ആ വിവരം അവരോടു പറയുക. അല്ലെങ്കില് പറഞ്ഞശേഷം മോഷ്ടിക്കുക.അടുത്ത ദിവസം ഒരു വീട്ടില് കയറി മോഷണത്തിനെരുങ്ങുമ്പോള് ഗുരുവിന്റെ വാക്കുകള് മോഷ്ടാവ് ഓര്മിച്ചു. ഞാനതെടുത്തിട്ട് ഉടമസ്ഥരോട് വിവരം പറഞ്ഞാല് എന്നെ അവര് പോലീസില് ഏല്പ്പിക്കും. പോലീസില് നിന്ന് തല്ല് കിട്ടും ജയിലിലടയ്ക്കും.
ഇത്രയുമോര്ത്തപ്പോള് അയാള് പെട്ടന്ന് പിന്വലിഞ്ഞു. എന്നാല് വീണ്ടും അത് എടുക്കുവാന് മനസ്സ് പ്രേരിപ്പിച്ചു. പക്ഷേ, സാധിച്ചില്ല. ശിക്ഷകളെക്കുറിച്ച് ഓര്മിച്ചപ്പോള് അതെടുക്കാനായില്ല. തിരികെ ഗുരുവിന്റെ അടുത്തെത്തി പറഞ്ഞു അങ്ങ്,എന്തു വിഡ്ഢിത്തമാണ് പറഞ്ഞത്? ഒന്നുകില് മോഷ്ടിച്ചിട്ടു പറയണം, അല്ലെങ്കില് പറഞ്ഞിട്ട് മോഷ്ടിക്കണം. ഇങ്ങനെ പറഞ്ഞാല്പ്പിന്നെ എങ്ങനെ മോഷ്ടിക്കാന് സാധിക്കും?’
ഗുരു മറുപടി പറഞ്ഞു: ‘നീ മോഷ്ടിക്കാതിരിക്കാന് വേണ്ടിയാണ് ഞാന് ഇങ്ങനെ ഉപദേശിച്ചത്. എന്റെ വാക്കുകള് നീ ഓര്ത്തപ്പോള് ആ സാഹചര്യത്തില് ശരിയായ ബോധം നിന്നില് വന്നു. നീ ചെയ്യാന് പോകുന്ന പ്രവൃത്തിയുടെ ഭവിഷ്യത്ത് എന്തെന്ന് നീ മനസ്സിലാക്കി. അതു നിന്നെ തെറ്റു ചെയ്യുന്നതില് നിന്നു പിന്തിരിയുവാന് സഹായിച്ചു.’
മക്കളേ, നിങ്ങള് ചെയ്യുന്ന ഒരോ കര്മ്മത്തിന്റെയും ഭവിഷത്തുകളെക്കുറിച്ച് നിങ്ങള്ക്കു ബോധമുണ്ടാവണം. എങ്കില് മക്കള് തെറ്റു ചെയ്യുകയില്ല. ഈ ബോധമില്ലാത്തതുകൊണ്ടാണ് മക്കള് തെറ്റുചെയ്യുന്നത്. അതുകൊണ്ട് നമ്മുടെ പ്രവൃത്തികളുടെ ഭവിഷത്തുകളെക്കുറിച്ച് ചിന്തിക്കുവാന് മക്കള്ക്കു കഴിയട്ടെ.
