ഈ ചിരി ഇനി ഓര്മ: വേളാങ്കണ്ണിയില് നിന്ന് യാത്ര പുറപ്പെടുന്നതിന് മുമ്പ് പൊന്നുവിന്റെ പിതാവ് രാജു അവറാച്ചന് സ്വന്തം മൊബൈലില് പകര്ത്തിയ ചിത്രം
വിഴിഞ്ഞം: തമിഴ്നാട്ടില് നാഗര്കോവിലിനു സമീപം വേളാങ്കണ്ണി തീര്ഥാടകര് സഞ്ചരിച്ചിരുന്ന വാഹനം അപകടത്തില്പ്പെട്ട് പട്ടം എസ്യുറ്റി ആശുപത്രിയില് ചികിത്സയില് കഴിഞ്ഞിരുന്ന ആന് യൂലിന് (നാലര ) ഇന്നലെ വൈകീട്ട് മൂന്ന് മണിയോട് മരിച്ചു. പേട്ട ഗുഡ് ഷെപ്പേര്ഡ് സ്കൂളിലെ എല്കെജി വിദ്യാര്ഥിനിയും വള്ളക്കടവ് കൊച്ച് തോപ്പിലെ ജുസാ റോഡ് റ്റിസി നമ്പര് 78/1215 വീട്ടില് രാജു-ജിനി ദമ്പതികളുടെ മകളുമാണ് പൊന്നു എന്ന ആന് യൂലിന്.
അപകടത്തില് പരിക്കേറ്റ് ചികിത്സയിലായിരിക്കെ രണ്ട് കാലുകളും കൈകളും മുറിച്ചു മാറ്റേണ്ടി വന്ന ഈ സുന്ദരിക്കുട്ടിയുടെ ദയനീയസ്ഥിതി ഇന്നലെ ജന്മഭൂമി റിപ്പോര്ട്ട് ചെയ്തിരുന്നു. ഇന്ഫക്ഷന് രക്തത്തിലേക്ക് കടന്നതാണ് മരണകാരണമെന്ന് മെഡിക്കല് സംഘം പറഞ്ഞു. ഇന്നലെ രാത്രി മുതല് അതീവ ഗുരുതരാവസ്ഥയിലായ കുഞ്ഞിന്റെ ജീവന് നിലനിര്ത്താന് ഡോക്ടര്മാരുടെ സംഘം വളരെ പണിപ്പെട്ടിരുന്നു. പക്ഷേ വിധി മറ്റൊന്നായിരുന്നു. സര്ക്കാരില് നിന്ന് ചികിത്സാ ചെലവ് നല്കാം എന്ന വാഗ്ദാനം പോലും ഇതുവരെ പാലിക്കപ്പെട്ടില്ല എന്നതും യാഥാര്ഥ്യമായി അവശേഷിക്കുന്നു.
