ആലപ്പുഴ: നഗരത്തിലെ അനധികൃത കയ്യേറ്റം ഒഴിപ്പിക്കലുമായി ബന്ധപ്പെട്ട് എംഎല്എയുടെയും കോണ് ഗ്രസ്- സിപിഎം, സിപിഐ അടക്കമുള്ള രാഷ്ട്രീയ കക്ഷികളുടേയും നടപടി പ്രതിഷേധാര്ഹമാണെന്നും, നഗരത്തിലെ കയ്യേറ്റക്കാര്ക്കൊപ്പം നില്ക്കുന്ന നടപടി എന്തിന് വേണ്ടിയാണെന്ന് വ്യക്തമാക്കാന് അവര് തയ്യാറാകണമെന്നും ബിജെപി അമ്പലപ്പുഴ നിയോജക മണ്ഡലം പ്രസിഡന്റ് എല്. പി. ജയചന്ദ്രനും ആലപ്പുഴ നിയോജക മണ്ഡലം പ്രസിഡന്റ് ആര്. ഉണ്ണികൃഷ്ണനും ആവശ്യപ്പെട്ടു. ജില്ലാ ഭരണകൂടം എടുത്ത നടപടിക്കൊപ്പം നില്ക്കാതെ എംഎല്എയും ഭരണ- പ്രതിപക്ഷപാര്ട്ടികളും കാട്ടുന്ന നിഷേധാത്മകമായ നടപടിയുടെ ഉദ്ദേശ്യശുദ്ധി വ്യക്തമാക്കണം. പൊതുജനത്തിന് നഗരത്തിലൂടെ നടക്കാന് പോലും സാധിക്കാത്ത സാഹചര്യമാണ് നിലവിലുള്ളത്.
അനധികൃത കയ്യേറ്റക്കാരില് നിന്ന് കോഴകള് വാങ്ങിയാണ് കാലങ്ങളായി ഭരണ- പ്രതിപക്ഷ കക്ഷികള് ഇവര്ക്കൊപ്പം നില്ക്കുന്നത്. ജില്ലാഭരണകൂടം എടുത്ത നടപടി അഭിനന്ദനാര്ഹമാണ്, നിലപാടില് ഉറച്ചു നില് ക്കാന് ജില്ലാ ഭരണകൂടം തയ്യാറാകണം. കയ്യേറ്റക്കാര്ക്കെതിരെ മാത്രമല്ല, യാത്രക്ക് മാര്ഗതടസ്സം സൃഷ്ടിക്കുന്ന വഴിയോരകച്ചവടക്കാരെയും ഒഴിപ്പിക്കാന് തയ്യാറാകണം. കയ്യേറ്റം ഒഴിപ്പിക്കുന്നതില് എല്ലാവിധ പിന്തുണയും ബിജെപി നല്കുമെന്നും, ഒഴിപ്പിച്ച കയ്യേറ്റങ്ങള് പുനസ്ഥാപിക്കുന്നത് തടയാന് സ്ഥിരം സംവിധാനം വേണമെന്നും അവര് ആവശ്യപ്പെട്ടു.
