കായംകുളം: റവന്യു ജില്ലാ സ്കൂള് കലോത്സവത്തിന് കായംകുളത്ത് വര്ണ്ണപകിട്ടാര്ന്ന തുടക്കം. ഇനിയുള്ള അഞ്ച് ദിനരാത്രങ്ങള് കായംകുളത്തിന് കലയുടെ വസന്തം. ജില്ലയിലെ കലാപ്രതിഭകള്ക്ക് കായംകുളത്തിന്റെ മണ്ണില് ലഭിച്ചത് വര്ണ്ണപകിട്ടാര്ന്ന സ്വീകരണം. ഇന്നലെ ഉച്ചയ്ക്ക് മൂന്നിന് ഗവ. ബോയ്സ് എച്ച്എസ്എസില് നിന്നും ആരംഭിച്ചു. കായംകുളം ഡിവൈഎസ്പി ഷിഹാബുദ്ദീന് ഘോഷയാത്ര ഫ്ളാഗ് ഓഫ് ചെയ്തു.
വിവിധ സ്കൂളുകളിലെ വിദ്യാര്ത്ഥികള് അവതരിപ്പിച്ച നിശ്ചലദൃശ്യങ്ങള്, വാദ്യമേളങ്ങള്, കലാരൂപങ്ങള് തുടങ്ങിയവ ഘോഷയാത്രക്കു മിഴിവേകി. ഘോഷയാത്ര നഗരം ചുറ്റി പ്രധാന വേദിയായ ഗവ.ഗേള്സ് എച്ച്എസ്എസ്സില് സമാപിച്ചു. തുടര്ന്ന് അരൂര് എംഎല്എ എ.എം. ആരിഫ് ഉദ്ഘാടനം ചെയ്തു. നഗരസഭ ചെയര്മാന് എന്.ശിവദാസന് അധ്യക്ഷത വഹിച്ചു. ചലച്ചിത്ര താരം അനൂപ് ചന്ദ്രന് വിശിഷ്ട അതിഥിയായിരുന്നു. ജനപ്രതിനിധികള്, അധ്യാപക സംഘടനാ പ്രതിനിധികള് തുടങ്ങിയവര് പങ്കെടുത്തു.
