വി എം പ്രവീണ്
കട്ടപ്പന: കട്ടപ്പനയില് പുതുതായി പണികഴിപ്പിക്കുന്ന മുന്സിപ്പല് കോംപ്ലക്സിന് സമീപം സ്ഥിതിചെയ്യുന്ന അമര്ജവാന് യുദ്ധസ്മാരകം അവഗണനയില്. കട്ടപ്പന നഗരസഭാ ഓഫീസ് സമുച്ചയ നിര്മ്മാണം പൂര്ത്തിയായി വരുമ്പോഴാണ് ഇതിന്റെ സമീത്ത് സ്ഥിതിചെയ്തിരുന്ന ദക്ഷിണേന്ത്യയിലെ തന്നെ പ്രധാനപ്പെട്ട സ്മാരകത്തിന് ഈ ദുര്ഗതി ഉണ്ടാകുന്നത്. യാതൊരു മാനദണ്ഡവും പാലിക്കാതെ സ്മാരകത്തോട് തൊട്ടുചേര്ന്നാണ് ഓഫീസിന്റെ നിര്മ്മാണം പൂര്ത്തിയാകുന്നത് നിയമപരമായി ഒരുകെട്ടിടം നിര്മ്മിക്കുമ്പോള് സമീപത്തുള്ള കെട്ടിടത്തില് നിന്നും 3 അടിയെങ്കിലും തള്ളിവേണം നിര്മ്മിക്കാനെന്ന നിയമം ആണ് നഗരസഭതന്നെ കാറ്റില് പറത്തിയിരിക്കുന്നത്. സ്മാരകത്തിന്റെ ഒരുഭാഗം കാണാന് കഴിയാത്ത രീതിയിലാണ് നിര്ദ്ദിഷ്ട ഓഫീസ് നിര്മ്മിച്ചിരിക്കുന്നത്. കട്ടപ്പനയിലെ വിമുക്തഭടന്മാരുടേയും പൊതുജനങ്ങളുടേയും ശ്രമഫലമായി കട്ടപ്പന പഞ്ചായത്ത് സ്റ്റേഡിയത്തിനടുത്ത് നല്കിയ സ്ഥലത്താണ് സ്മാരകം ഉയര്ന്നത്. 2013 നവംബര് 29ന് അന്നത്തെ സതേണ് നേവല് കമാന്റിംഗ് ചീഫ് വൈസ് അഡ്മിറല് സതീഷ് സോണിയാണ് ഇത് രാഷ്ട്രത്തിന് സമര്പ്പിച്ചത്. ദക്ഷിണേന്ത്യയിലെ അപൂര്വ്വ സ്മാരകങ്ങളില് ഒന്നായ ഇത് രാഷ്ട്രത്തിന് വേണ്ടി ജീവന് ബലിയര്പ്പിച്ച സ്വാതന്ത്ര്യ സമരസേനാനികളുടേയും രാജ്യത്തിന് വേണ്ടി ജീവന് ബലിയര്പ്പിച്ച സൈനികരുടേയും പാവനസ്മരണക്കായാണ് പണികഴിപ്പിച്ചത്. രാഹുല്ഗാന്ധി ഉള്പ്പെടെ കട്ടപ്പനയില് എത്തിയ പ്രമുഖര് ഇവിടെയെത്തി പുഷ്പാര്ച്ചന നടത്തിയിരുന്നു. ധീര ദേശാഭിമാനികളോടുള്ള ഈ അവഗണനയ്ക്കെതിരെ കടുത്ത പ്രതിഷേധമാണ് പൊതു സമൂഹത്തില് നിന്നും ഉയരുന്നത്.
