ന്യൂദല്ഹി: നാഷണല് ഹെറാള്ഡ് കേസില് കോടതി നടപടികളെ രാഷ്ട്രീയവല്ക്കരിക്കാനുള്ള കോണ്ഗ്രസിന്റെ നീക്കത്തിനെതിരെ ബിജെപി. കോണ്ഗ്രസ് അഴിമതിയുടെ രാജാക്കന്മാരായി മാറിയിരിക്കുകയാണ്. അഴിമതിക്കേസില് കോടതിക്ക് മുന്നിലേക്ക് പോയ കോണ്ഗ്രസ് നേതാക്കള് സ്വാതന്ത്രസമര ഭടന്മാരെപ്പോലെയാണ് പ്രതികരണങ്ങള് നടത്തുന്നതെന്ന് ബിജെപി നേതാവും കേന്ദ്രമന്ത്രിയുമാ മുഖ്താര് അബ്ബാസ് നഖ്വി പറഞ്ഞു. റോഡില് നാടകം കളിച്ച് അഴിമതിക്കുവേണ്ടി നാണംകെട്ട നിലയില് പോരാടുകയാണ് കോണ്ഗ്രസ് നേതൃത്വമെന്നും നഖ്വി പറഞ്ഞു.
കോടതിക്കുള്ളില് നടന്നത് സംബന്ധിച്ച് ബിജെപി പ്രതികരിക്കുന്നില്ലെന്നും എന്നാല് കോടതിക്ക് വെളിയില് കോണ്ഗ്രസ് നടത്തുന്ന നാടകം കണ്ടില്ലെന്ന് നടിക്കാനാവില്ലെന്നും ബിജെപി നേതാവ് പറഞ്ഞു. രാജ്യത്ത് അഴിമതിക്കെതിരായി നിരവധി പോരാട്ടങ്ങള് നമ്മള് കണ്ടിട്ടുണ്ട്. എന്നാല് രാജ്യത്തിന്റെ ചരിത്രത്തില് ഇതാദ്യമായിട്ടാണ് അഴിമതിക്കുവേണ്ടി പ്രതിഷേധ പ്രകടനങ്ങള് കാണുന്നത്. രാഷ്ട്രം ഇന്ന് കണ്ടത് കോണ്ഗ്രസിന്റെ അഴിമതിയോടുള്ള വിപ്ലവാത്മക പിന്തുണയാണ്.
നാഷണല് ഹെറാള്ഡ് കേസില് ബിജെപി കേന്ദ്ര ഓഫീസല്ല കോണ്ഗ്രസ് നേതാക്കളെ വിളിച്ചു വരുത്തിയതെന്ന്, കേസ് കേന്ദ്രസര്ക്കാരും ബിജെപിയും രാഷ്ട്രീയ പ്രേരിതമായി നടത്തിയതാണെന്ന കോണ്ഗ്രസിന്റെ ആരോപണത്തിനെതിരെ നഖ്വി പറഞ്ഞു. കോടതിയാണ് അവരെ വിളിച്ചുവരുത്തിയത്. ഇതില് പാര്ട്ടിക്കോ സര്ക്കാരിനോ എന്തു കാര്യം. കോടതിയുമായി ബന്ധപ്പെട്ട ഒരു കാര്യത്തില് അവര് രാഷ്ട്രീയം കളിക്കുകയാണ്. അഴിമതിമുക്ത ഭാരതം എന്ന ലക്ഷ്യത്തിനായാണ് കോണ്ഗ്രസ് ഇല്ലാത്ത ഭാരതം എന്ന പ്രചാരണം ബിജെപി ആരംഭിച്ചതെന്ന് ഇത്തരം സംഭവങ്ങള് പൊതുജനങ്ങളെ ബോധ്യപ്പെടുത്തും. പ്രതിപക്ഷത്തിന്റെ ഇത്തരം നടപടികള് കൊണ്ട് രാജ്യത്തെ ജനങ്ങള് ഭയപ്പെടില്ലെന്നും നഖ്വി പറഞ്ഞു.
എല്ലാ ദിവസവും പ്രധാനമന്ത്രി നരേന്ദ്രമോദിയെ കുറ്റംപറഞ്ഞില്ലെങ്കില് ചില ആളുകള്ക്ക് അവര് കഴിച്ച ഭക്ഷണം ദഹിക്കില്ലെന്ന് രാഹുല്ഗാന്ധി മോദിക്കെതിരെ നടത്തിയ പ്രസ്താവന പരാമര്ശിച്ചുകൊണ്ട് നഖ്വി പറഞ്ഞു. ജാമ്യംകിട്ടി ആഹ്ലാദിച്ച സോണിയയേയും രാഹുലിനെയും വിമര്ശിച്ച കേന്ദ്രപരിസ്ഥിതി മന്ത്രി പ്രകാശ് ജാവദേക്കര്, ലഭിച്ചത് ജാമ്യമാണെന്നും മെഡലല്ലെന്നും പറഞ്ഞു. നിയമപ്രക്രിയയാണ് നടന്നതെന്നും കേന്ദ്രസര്ക്കാരിന് ഇതില് യാതൊരു കാര്യവുമില്ലെന്നും ജാവദേക്കര് പറഞ്ഞു. കോടിക്കണക്കിന് രൂപയുടെ ആസ്തികള് അവര് തട്ടിയെടുത്തതിന്റെ പേരില് കോടതി അവരെ വിളിച്ചുവരുത്തിയതാണെന്നും ജാവദേക്കര് പറഞ്ഞു.
