ആലപ്പുഴ: വാഹനയാത്രികര്ക്ക് ഭീഷണിയുയര്ത്തി ദേശീയപാത പൊട്ടിപ്പൊളിയുന്നു. കുഴികള് കാരണം അപകടം വ്യാപകമായി. അപകടങ്ങളില്പ്പെടുന്നവരില് ഏറെയും ഇരുചക്രവാഹനയാത്രക്കാരാണ്. അമിതവേഗത്തില് വരുന്ന വാഹനങ്ങള് കുഴിയില് വീഴാതിരിക്കാന് വെട്ടിക്കുമ്പോഴാണ് അപകടം ഏറെയും ഉണ്ടാകുന്നത്.
കുഴികളില് വെള്ളംകെട്ടിക്കിടക്കുന്നതും കാരണമാകുന്നു. ടാറിങ് തകരുമ്പോള് തെറിക്കുന്ന മെറ്റലുകളില് ഇരുചക്രവാഹനങ്ങള് കയറി അപകടങ്ങളുണ്ടാകുന്നതും പതിവാണ്. ടാറിങ് പാളികളായി ഇളകിപ്പോയാണ് കുഴികളിലധികവും രൂപപ്പെടുന്നത്. ഇത്തവണ ശബരിമല തീര്ഥാടന കാലത്തിനു മുമ്പായി അറ്റകുറ്റപ്പണി നടന്നില്ല.
തീര്ത്ഥാടകരുടെ മുഖ്യ ഇടത്താവളങ്ങളായ അമ്പലപ്പുഴ ശ്രീകൃഷ്ണസ്വാമി ക്ഷേത്രം, മുല്ലയ്ക്കല് രാജരാജേശ്വരി ക്ഷേത്രം, ചക്കുളത്തുകാവ് ഭഗവതി ക്ഷേത്രം, ഹരിപ്പാട് സുബ്രഹ്മണ്യസ്വാമി ക്ഷേത്രം, ചേര്ത്തല കാര്ത്ത്യായനി ദേവീക്ഷേത്രം, മണ്ണാറശാല നാഗരാജക്ഷേത്രം തുടങ്ങിയിടങ്ങളിലേക്ക് ദേശീയപാതയിലൂടെ ദിവസവും ആയിരക്കണക്കിന് അയ്യപ്പന്മാരാണ് എത്തുന്നത്.
ദേശീയപാതയില് ചേര്ത്തല മുതല് അമ്പലപ്പുഴവരെയുള്ള ഭാഗങ്ങളില് ചേര്ത്തല മായിത്തറ, തിരുവിഴ, കണിച്ചുകുളങ്ങര, എസ്.എന് കോളജിന് തെക്കുവശം, കഞ്ഞിക്കുഴി, മാരാരിക്കുളം, വളവനാട്,വലിയ ചുടുകാടിന് സമീപം, എസ്ഡി കോളജിന് തെക്കുവശം, പുന്നപ്ര ജംഗ്ഷന്, ആലപ്പുഴ മെഡിക്കല്കോളജ് കാവാടം എന്നിവിടങ്ങളിലാണ് പുതുതായി കുഴികള് രൂപപ്പെട്ടിരിക്കുന്നത്.
ആലപ്പുഴ നഗരത്തോടു ചേര്ന്നുകിടക്കുന്ന വലിയ ചുടുകാടിന് സമീപം ദേശീയപാത തകര്ന്നത് പലപ്പോഴും ഗതാഗതക്കുരുക്കിന് വഴിവയ്ക്കുന്നു. ശവക്കോട്ട പാലത്തിന് സമീപം രൂപപ്പെട്ടിരിക്കുന്ന വലിയഗര്ത്തം മൂലം നഗരത്തില് ഗതാഗതക്കുരുക്ക് രൂക്ഷമാകുകയാണ്. പലപ്പോഴും കിലോമീറ്ററുകളോളം വാഹനങ്ങള് ഒന്നിനുപുറകെ ഒന്നായി കിടക്കുന്നതും പതിവുകാഴ്ചയാണ്്.
ട്രാഫിക് സിഗ്നലിന്റെ അഭാവവും കുഴികളുമാണ് ശവക്കോട്ടപ്പാലത്തിന് സമീപത്തെ ഗതാഗതക്കുരുക്കിന് പ്രധാനകാരണം. ഇവിടുത്തെ ഗതാഗതക്കുരുക്ക് നിയന്ത്രിക്കാന് പോലീസ് പാടുപെടുന്നുണ്ട്. ആലപ്പുഴ മെഡിക്കല് കോളജില് നിന്നും അത്യാസന്ന നിലയിലായ രോഗികളെക്കൊണ്ട് എറണാകുളത്തെ സ്വകാര്യ ആശുപത്രികള്, കോട്ടയം മെഡിക്കല് കോളജ് എന്നിവിടങ്ങളിലേക്ക് പോകുന്ന ആംബുലന്സുകള്ക്ക് റോഡ് പൊട്ടിപ്പൊളിഞ്ഞുകിടക്കുന്നത് ബുദ്ധിമുട്ടാകുന്നു.
ദേശീയപാതയില് കുഴികള് അടയ്ക്കുന്നതിന് പകരം റീടാറിങ് വേണമെന്നാണ് ആവശ്യമുയരുന്നത്.
