ആലപ്പുഴ: ജില്ലാ പഞ്ചായത്ത് പ്രസിഡന്റായി സിപിഎമ്മിലെ ജി. വേണുഗോപാല് തെരഞ്ഞെടുക്കപ്പെട്ടു. സിപിഎമ്മിലെ ദലീമ ജോജോയാണ് വൈസ് പ്രസിഡന്റ്. സിപിഐയ്ക്ക് വൈസ്പ്രസിഡന്റ് സ്ഥാനം നല്കാന് സിപിഎം തയ്യാറായില്ല.
പ്രസിഡന്റ് തെരഞ്ഞെടുപ്പില് പുന്നപ്ര ഡിവിഷനില് നിന്നു വിജയിച്ച ജി. വേണുഗോപാലിന് 15 വോട്ടും പള്ളിപ്പാട് ഡിവിഷനില്നിന്നുള്ള അംഗം ജോണ് തോമസിന് ഏഴു വോട്ടും ലഭിച്ചു. ആര്യാട് ഡിവിഷനില് നിന്നുള്ള എല്ഡിഎഫിലെ ജുമൈലത്തിന്റെ വോട്ട് അസാധുവായി. ബാലറ്റ് പേപ്പറിന്റെ മറുപുറത്ത് ഒപ്പു രേഖപ്പെടുത്താതിനെത്തുടര്ന്നാണ് വോട്ട് അസാധുവായത്. തുടര്ന്ന് ജി. വേണുഗോപാല് സത്യപ്രതിജ്ഞ ചെയ്തു. വരണാധികാരിയായ ജില്ലാ കളക്ടര് എന്. പത്മകുമാര് സത്യവാചകം ചൊല്ലിക്കൊടുത്തു.
ഉച്ചകഴിഞ്ഞ് നടന്ന വൈസ് പ്രസിഡന്റ് തെരഞ്ഞെടുപ്പില് അരൂര് ഡിവിഷനില്നിന്നുള്ള ദലീമ ജോജോയ്ക്ക് 16 വോട്ടും മുതുകുളം ഡിവിഷനില്നിന്നുള്ള ബബിത ജയന് ഏഴു വോട്ടും ലഭിച്ചു. ദലീമയ്ക്ക്് പ്രസിഡന്റ് ജി. വേണുഗോപാല് സത്യവാചകം ചൊല്ലിക്കൊടുത്തു. സിപിഐക്ക് ഇത്തവണ വൈസ്പ്രസിഡന്റ് സ്ഥാനം പോലും നല്കാതെ അവഗണിച്ചു.
കഴിഞ്ഞ തവണ തുടക്കം മുതല് തന്നെ പ്രസിഡന്റും വൈസ്പ്രസിസന്റും തമ്മില് ശീതസമരമായിരുന്നു. പ്രസിഡന്റിനെതിരെ ജന്ഡര് പാര്ക്ക് വിഷയത്തില് സിപിഐക്കാരനായ വൈസ്പ്രസിഡന്റ് അഴിമതി ആരോപണങ്ങള് വരെ ഉന്നയിച്ചിരുന്നു. ഈ സാഹചര്യത്തിലാണ് സിപിഐയെ ഒഴിവാക്കിയതെന്ന് പറയപ്പെടുന്നു.
