ഉച്യതേപ്രകൃതിഃപുംസോ
ഭോഗമോക്ഷകരീമതാ
സൃഷ്ട്യാച തത്വവിജ്ഞാനോ
ഭാവനാച്ച യഥാക്രമം.
ശ്രീ ശങ്കരചരിതം സര്ഗ്ഗം 21 ശ്ലോകം
ഏകപാദനായ ധര്മ്മത്തെ കലി പീഡിപ്പിക്കുന്ന കാഴ്ചയാണല്ലോ പരീക്ഷിത്ത് മഹാരാജാവിന് കാണേണ്ടിവന്നത്. ആ കലി ഇന്നും സര്വ്വസ്വതന്ത്രനായി സര്വ്വത്ര വിഹരിക്കുകയാണ്. യോഗരതരാവാതെ ഭോഗരതരും സ്വാര്ത്ഥമതികളുമായ മനുഷ്യരെക്കൊണ്ട് ഭൂലോകം നിറയുകയാണ്.
ജീവജാലങ്ങളെല്ലാം ത്രിഗുണങ്ങള്ക്കധീനരാണ്. ഇക്കാലത്ത് സത്യധര്മ്മങ്ങളും മോക്ഷചിന്തയും ജീവിതത്തില് നിന്ന് വേറിട്ട്നില്ക്കും. അര്ത്ഥകാമികളായി ജീവിതം കഴിഞ്ഞുപോകും. മനുഷ്യരും മറ്റു ജീവജാലങ്ങളും വൃക്ഷലതാദികളും കാലം കഴിയുംതോറും ചെറുതായി വരും. ഈശ്വരസ്മരണ ഇല്ലാതായി വേദനിഷേധികളായി നാസ്തികരായ ജനങ്ങള് സഹജീവികളില് കാരുണ്യമില്ലാതെ സ്വാര്ത്ഥമതിളായിത്തീരും. കുടുംബബന്ധങ്ങള് ശിഥിലമാകും. അച്ഛന്, അമ്മ, സഹോദരങ്ങള് എന്നിവരെയൊന്നും മാനിക്കുകയില്ല. ധനത്തിനുവേണ്ടി എന്തു ദുഷ്കര്മ്മങ്ങളും ചെയ്യാന് മടിക്കില്ല. പുരുഷന്മാരെ പ്രലോഭിപ്പിക്കാനായി സ്ത്രീകള് സദാചാര നിഷേധികളായിത്തീരും. ഭാര്യാഭര്ത്തൃ ബന്ധം വെറും ലൈംഗികതയില് ഒതുങ്ങും. വൈദികച്ചടങ്ങുകളില്ലാതെ വിവാഹം നടക്കും.
പുരുഷന് സ്ത്രീയെയും സ്ത്രീ പുരുഷനേയും സ്വീകരിക്കുന്നതു മാത്രമാകും വിവാഹം. കുളിച്ചില്ലെങ്കിലും ശിരോലങ്കാരം മാത്രമാകും സ്നാനത്തിനുള്ള പ്രതിവിധി. ജനങ്ങളെല്ലാം ദുഷ്ടമനസ്കരായിത്തീരും. ശക്തനായുള്ളവന് നാടുഭരിക്കും. രാജാവ്-ഭരിക്കുന്നവന്-പ്രജകളുടെ സ്വത്തിനെയും സത്രീജനങ്ങളെയും ബലാത്ക്കാരമായി അപഹരിക്കും. ഇടിയും മിന്നലും വര്ദ്ധിച്ച് മഴചുരുങ്ങിവരും. ഭൂമിയില് വരള്ച്ച ബാധിച്ച് സസ്യങ്ങള് ഇല്ലാതും. വര്ദ്ധിച്ച നികുതിഭാരത്താലും ക്ഷാമം മൂലവും പ്രജകള് കഷ്ടതയനുഭവിക്കും. പലവിധ വ്യാധികളാല് ദുരിതപ്പെടും. കൊടുക്കല്വാങ്ങലുകള് വഞ്ചനാപരമാകും.
ധനമില്ലാത്തവന് നീതി ലഭിക്കുകയില്ല. ആയുസ്സ് ചുരുങ്ങിവരും. സാധാരണക്കാരുടെ സ്വത്തിനും ജീവനും സംരക്ഷണമില്ലാ തായി വരും. ഭരിക്കുന്നവര് കള്ളന്മാരെപ്പോലെ പ്രജകളുടെ സ്വത്ത് അപഹരിക്കുന്നവരായിരിക്കും. വര്ണ്ണാചാരങ്ങള് അസ്തമിക്കും. ഉത്തമ ബ്രാഹ്മണനെ കണികാണാന്പോലും കിട്ടില്ല. ബ്രാഹ്മണന് പൂണൂല് മാത്രം പ്രമാണമാകും. സംന്യാസിക്ക് കാവി വസ്ത്രം പ്രമാണം. സംന്യാസധര്മ്മം വെടിഞ്ഞ് ധനേച്ഛുക്കളും ലോഭികളുമായിത്തീരും. നാലാശ്രമികളും ആശ്രമധര്മ്മം പാലിക്കാത്തവരായിരിക്കും. ധനികന് പരമപൂജ്യനാകും. വാക്സാമര്ത്ഥ്യമുള്ളവനെ പണ്ഡിതനായിഗണിക്കും. ആയുസ്സ്, ബലം, ഓര്മ്മ ഇവയെല്ലാം ക്ഷയിച്ചുവരുന്നതായി കാണാം. ഇങ്ങനെ കലികാലവൈഭവങ്ങള് ഒട്ടനവധി വര്ണ്ണിക്കപ്പെട്ടിട്ടുണ്ട്.
തുടരും
