ആലപ്പുഴ: നഗരസഭയിലെ പുന്നമട, കരളകം, ജില്ലാകോടതി, തത്തംപള്ളി അടക്കമുള്ള ബഹുഭൂരിപക്ഷം വാര്ഡുകളിലും യുഡിഎഫ് സ്ഥാനാര്ത്ഥികള് സര്ക്കാര് പ്രസിദ്ധീകരണങ്ങള് വിതരണം ചെയ്ത് വോട്ടു പിടിക്കുന്നു.
ജില്ലാ ഇന്ഫര്മേഷന് ഓഫീസറുടെ പേരില് ഇന്ഫര്മേഷന് പബ്ലിക് റിലേഷന്സ് ഡിപ്പാര്ട്ട്മെന്റ് പ്രസിദ്ധീകരിച്ച ‘എല്ലായിടത്തും വികസനം എല്ലാവര്ക്കും ക്ഷേമം’ എന്ന 44 പേജുള്ള കൈപ്പുസ്തകം സൗജന്യമായി യുഡിഎഫ് സ്ഥാനാര്ത്ഥികള് വിതരണം ചെയ്താണ് വോട്ടു പിടിക്കുന്നത്. യുഡിഎഫ് സര്ക്കാരിന്റെ ഭരണനേട്ടങ്ങള് ചിത്രങ്ങള് സഹിതം അച്ചടിച്ചാണ് വിതരണത്തിന് തയ്യാറാക്കിയിരിക്കുന്നത്.
ആലപ്പുഴ ജില്ലാ ഇന്ഫര്മേഷന് ഓഫീസര് തിരുവനന്തപുരം ഓറഞ്ച് പ്രസില് ആലപ്പുഴ ജില്ലയിക്ക് വേണ്ടി അച്ചടിച്ചത് എത്രകോപ്പിയെന്ന് ബുക്കില് രേഖപ്പെടുത്തിയിട്ടില്ല. പുസ്തകം സൗജന്യമാണോ വിലയ്ക്കുള്ളതാണോയെന്നും രേഖപ്പെടുത്തിയിട്ടില്ല. അതുപോലെ എന്ന് അച്ചടിച്ച് വിതരണം നടത്തുന്ന തീയതിയും മനപൂര്വ്വം രേഖപ്പെടുത്തിയിട്ടില്ല.
പരാജയഭീതി പൂണ്ട യുഡിഫ് സ്ഥാനാര്ത്ഥികള് തെരഞ്ഞെടുപ്പ് പെരുമാറ്റച്ചട്ടം ലംഘിച്ചിരിക്കുകയാണെന്നും ജില്ലാ ഇന്ഫര്മേഷന് ഭരണകൂടം നിഷ്പക്ഷമായി പ്രവര്ത്തിക്കുന്നില്ലെന്നും യുഡിഎഫ് സ്ഥാനാര്ത്ഥികള്ക്കായുള്ള പ്രവര്ത്തനം അവസാനിപ്പിക്കണമെന്നും ഇതിന്മേല് ഗൗരവമായ അന്വേഷണം നടത്താന് കളക്ടര് തയ്യാറായി നടപടി സ്വീകരിക്കണമെന്നും കേരളാ കോണ്ഗ്രസ് സെക്യുലര് ജില്ലാ പ്രസിഡന്റ് ബേബി പാറക്കാടന് ആവശ്യപ്പെട്ടു. ഇതുസംബന്ധിച്ച് പാറക്കാടന് ജില്ലാ കളക്ടര്ക്ക് പരാതി നല്കി.
