മൂന്നാര്‍ : മാട്ടുപ്പെട്ടി കുറ്റിയാര്‍ ചോലവനങ്ങളില്‍ പഞ്ചായത്ത് അധികൃതര്‍ നിയന്ത്രണമില്ലാതെ മാലിന്യങ്ങള്‍ തള്ളുന്നത് വന്യമ്യഗങ്ങള്‍ക്കു ഭീഷണിയാവുന്നു. സഞ്ചാരികള്‍ ഏറെയെത്തുന്ന മാട്ടുപ്പെട്ടി, എക്കോപോയിന്റ്, കുണ്ടള മേഖലയില്‍ നിന്നും ശേഖരിക്കുന്ന മാലിന്യങ്ങളാണ് അധികൃതര്‍ കുറ്റിയാര്‍വാലിയില്‍ നിക്ഷേപിക്കുന്നത്. പ്ലാസ്റ്റിക്ക് കുപ്പികള്‍, ചില്ലുകള്‍, അഴുകിയ ഭക്ഷണപദാര്‍ത്ഥങ്ങള്‍, മരുന്നുകുപ്പികള്‍ എന്നിവയാണ് വന്‍തോതില്‍ വനത്തിലേക്കു തള്ളുന്നത്. കേന്ദ്ര സര്‍ക്കാരിന്റെ സഹായത്തോടെ ദേവികുളം പഞ്ചായത്തിന്റെ കീഴില്‍ മാലിന്യങ്ങള്‍ ശേഖരിച്ചു നശിപ്പിക്കുന്നതിന് യൂണിറ്റ് പ്രവര്‍ത്തിക്കുന്നുണ്ടെങ്കിലും ഇത് ഫലം കാണാതെ പോകുന്നതാണ് പ്രശ്‌നങ്ങള്‍ക്കു കാരണം. തലസ്ഥാനത്തെ രാഷ്‌ട്രീയ സ്വാധീനം ഉപയോഗിച്ച് ദേവികുളം പഞ്ചായത്തില്‍ നിന്നും കരാര്‍ ഏറ്റെടുത്തവര്‍ സര്‍ക്കാരിന്റെ പണം തട്ടിയെടുക്കുന്നതല്ലാതെ മാലിന്യപ്രശ്‌നങ്ങള്‍ക്ക് പ്രതിവിധിയുണ്ടാക്കുന്നില്ല. തൊഴിലാളികളെ ഉപയോഗിച്ചു ശേഖരിക്കുന്ന മാലിന്യങ്ങള്‍ എവിടെയാണ് നിക്ഷേപിക്കുന്നതെന്നുപോലും ഇവര്‍ക്കറിയില്ല. ദിവസവും മൂന്നും നാലും ലോഡുമാലിന്യങ്ങളാണ് അധികൃതര്‍ മാട്ടുപ്പെട്ടിക്കു കുറ്റിയാര്‍വാലിയിലെ വനത്തില്‍ നിക്ഷേപിക്കുന്നത്. പുലി, കാട്ടുപോത്ത്, കാട്ടാന തുടങ്ങളിയ പതിനായിരത്തിലധികം വന്യമൃഗങ്ങള്‍ ജീവിക്കുന്ന വനപ്രദേശങ്ങളില്‍ സ്വകാര്യതാല്‍പര്യങ്ങള്‍ക്കായി ചിലര്‍ മാലിന്യങ്ങള്‍ തള്ളുന്നത് വന്യമ്യഗങ്ങള്‍ ചത്തൊടുങ്ങുന്നതിനു കാരണമാകും. കുണ്ടളയ്‌ക്കു സമീപത്തെ ചോലവനങ്ങളില്‍ പ്ലാസ്റ്റിക്കു ഭക്ഷിച്ചു കാട്ടാനയടക്കമുള്ള വന്യമ്യഗങ്ങള്‍ ചത്തൊടുങ്ങിയിരുന്നു. കഴിഞ്ഞ ദിവസം സാന്റോസ് കോളനിക്കു സമീപത്തു അഞ്ചുകാട്ടുപോത്തുകള്‍ ചത്തൊടുങ്ങിയിരുന്നു. വനമേഖലകളില്‍ നിക്ഷേപിച്ച പ്ലാസ്റ്റിക്കുകള്‍ ഭക്ഷിച്ചതാണ് കാട്ടുപോത്തുകള്‍ ചത്തൊടുങ്ങാന്‍ ഇടയാക്കിതെന്നാണ് വനപാലകരുടെ പ്രാഥമിക വിലയിരുത്തല്‍. ജനവാസമേഖകളില്‍ നിന്നും ശേഖരിക്കുന്ന മാലിന്യങ്ങള്‍ അധികൃതരുടെ ഒത്താശയോടെ വനങ്ങളില്‍ നിക്ഷേപിക്കുന്നതിനെതിരെ ഉടന്‍ നടപടികള്‍ സ്വീകരിച്ചില്ലെങ്കില്‍ മൂന്നാറിലെ വന്യമ്യഗങ്ങള്‍ നാമാവശിഷ്ടമാകും.
പ്രതികരിക്കാൻ ഇവിടെ എഴുതുക: