ലോകൈകനാഥനായ ശ്രീപരമേശ്വരന്റെയും ശ്രീപര്വ്വതിദേവിയുടെയും പുത്രനായ മഹാഗണപതിയുടെ ജന്മനക്ഷത്രമായ ശ്രാവണമാസത്തിലെ (ചിങ്ങം) ശുക്ലപക്ഷചതുര്ത്ഥി-ശ്രീവിനായകചതുര്ത്ഥി മഹോത്സവമാണിന്ന്. ശ്രീവിനായക ഉപാസകരുടെ മഹാപുണ്യദിനമാണീ സുദിനം. വിനായകചതുര്ത്ഥിയിലെ ഗണേശപൂജ, വ്രതം എന്നിവ ജീവിതത്തിലെ മിക്ക ദുഃഖങ്ങളും ഹനിക്കുവാനുപകരിക്കും. വ്രതമെടുക്കുന്നവര് തലേദിവസം മുതല് വ്രതനിഷ്ഠകള് ആരംഭിക്കുന്നു. ഈ പുണ്യദിവസം ബ്രഹ്മമുഹൂര്ത്തത്തില് ഉണര്ന്ന് ദേഹശുദ്ധി വരുത്തി ശ്രീഗണപതി ക്ഷേത്രദര്ശനം നടത്തിവരുന്നു. ഗൃഹത്തില് ഗണേശസഹസ്രനാമം, ഗണേശരപുരാണം, സൂക്തങ്ങള് തുടങ്ങിയവ ജപിക്കുന്നു. ചതുര്ത്ഥിയുടെ തലേദിവസം രാത്രി ഉപവസിക്കണം, ചതുര്ത്ഥി ദിനത്തില് പഴവര്ഗ്ഗമോ ലഘുഭക്ഷണമോ കഴിക്കാം. ഈ ദിവസം ഗൃഹത്തില് ഗണപതിഹോമം നടത്തുന്നത് ശ്രേയസ്ക്കരമാണ്. ചതുര്ത്ഥിയുടെ പിറ്റേദിവസം ക്ഷേത്രദര്ശത്തോടെ വ്രതം പൂര്ത്തിയാക്കാം.
പ്രപഞ്ചത്തിലെ ഏതു ഭാവവും കൈക്കൊള്ളുന്ന മഹാദേവനാണ് ശ്രീമഹാഗണപതി. ഉപാസകന് ആഗ്രഹസാഫല്യമേകുകയും വളരെ എളുപ്പം അനുഗ്രഹം നല്കുന്ന ദയാനിധിയും ക്ഷിപ്രപ്രസാദിയുമാണ് ശ്രീവിനായകന്. വിനായക ചതുര്ത്ഥി ദിനത്തില് ചന്ദ്രനെ കാണരുതെന്നാണ് വിശ്വാസം. അഥവാ കണ്ടാല് ദുഷ്കീര്ത്തി, അപമാനം, നഷ്ടങ്ങള് എന്നിവ സംഭവിയ്ക്കുമത്രേ.
ഇതേപ്പറ്റി പറയുന്ന ഐതീഹ്യം ഇപ്രകാരമാണ്. വിനായക പ്രീതിക്കായി എല്ലായിടത്തുനിന്നും ധാരാളം മധുര പലഹാരങ്ങളടക്കം വയറുനിറയെ ഗണപതിയ്ക്കു ലഭിച്ചു. എന്തും അകത്താക്കുവാന് ഗണേശനുള്ള സാമര്ത്ഥ്യം പറയാതെ തന്നെ അറിയാമല്ലോ? അങ്ങിനെ അന്ന് വൈകുന്നേരമായപ്പോഴേയ്ക്കും ആകെ വയ്യാതായി അടിവച്ച് പതുക്കെനടന്നു. അതിനിടയില് ഒരു കല്ലുതട്ടി ഗണപതി ഉരുണ്ടുവീണു. സങ്കടം സഹിക്കാതെ ചുറ്റുംനോക്കി ഇതാരെങ്കിലും കണ്ടുവോ എന്നുനോക്കി. ആരും കണ്ടിട്ടില്ല. സമാധാനമായെന്നു വിചാരിച്ചിരിക്കുമ്പോഴാണ് ഒരുചിരികേട്ടത് നോക്കിയപ്പോള് ചിരിച്ചത് മറ്റാരുമല്ല ശശാങ്കന്തന്നെ. എന്നെ നോക്കി പരിഹസിച്ചനിന്നെ ഇന്നേദിനത്തില് കാണുന്നവര്ക്ക് അപഖ്യാതിയുണ്ടാവട്ടേ എന്ന് നല്ലശാപവും കൊടുത്തു. ഏകാഗ്രത, നിര്മ്മലമായ മനസ്സ്, അര്പ്പണ ബുദ്ധി, മനഃശുദ്ധി, ദേഹശുദ്ധി എന്നിവയുണ്ടായാല് ഗണേശ്വര പ്രീതി വളരെ എളുപ്പത്തില് ലഭിക്കും.
ദിവസവും രാവിലെ സൂര്യോദയത്തിന് മുന്പ് എഴുന്നേറ്റ് ദേഹശുദ്ധിവരുത്തി, വെളുത്ത വസ്ത്രം ധരിച്ച് ഗണേശാരാധന തുടങ്ങാം. ഗണേശവിഗ്രഹമോ, ചിത്രമോ വെച്ച് അതിനു മുന്നിലെ നിലവിളക്കില് നെയ്യോ, എള്ളെണ്ണയോ ഒഴിച്ച് രണ്ട് തിരിയിട്ട് ദീപം തെളിയിക്കുക. ശ്രീഗണേശനെ മനസ്സില് ധ്യാനിച്ച് ശ്രീഗണേശസൂക്തങ്ങള്, ഗണേശസഹസ്രനാമം എന്നിവ ഉരുവിടുക. സാധാരണക്കാര്ക്ക് എളുപ്പം ചെയ്യാവുന്ന ശ്രീ വിനായക ഉപാസന ഇതുതന്നെ. വെള്ളിയാഴ്ചകളിലെ ശ്രീ ഗണപതി ക്ഷേത്രദര്ശനം കൂടുതല് ഫലം തരുമെന്നാണ് വിശ്വാസം. കറുകമാല ഗണപതിക്ക് പ്രിയങ്കരവും, അപ്പം, അട, മോദകം തുടങ്ങിയവ വളരെ ഇഷ്ടവുമാണ്. കേതുദശയിലും കേതു അപഹാരങ്ങളിലും കഴിയുന്നവരുടെ ദുരിതങ്ങള് ഒഴിവാക്കി കിട്ടുവാന് വിനായക ചതുര്ത്ഥിദിനത്തില് ഗൃഹത്തില് ഗണപതിഹോമം നടത്തുന്നത് അതിശ്രേഷ്ഠമാണ്. ആത്മീയചൈതന്യത്തിന്റെ കേന്ദ്രബിന്ദുവുമായ മൂലാധാരചക്രത്തിന്റെ അടിസ്ഥാനദേവതയാണ് ശ്രീ മഹാഗണപതി. നമ്മളില് കുടികൊണ്ട് ശക്തിയും ബുദ്ധിയും പ്രവഹിപ്പിക്കുന്ന ശ്രീ മഹാഗണപതിയെ പ്രീതിപ്പെടുത്തി സര്വ്വവിഘ്നങ്ങളും അകറ്റി അഭീഷ്ടസിദ്ധി കൈവരിക്കുവാനുള്ള മഹാപുണ്യദിനം കൂടിയാണ് വിനായകചതുര്ത്ഥി. തുലാമാസത്തിലെ തിരുവോണം, മീനമാസത്തിലെ പൂരവും ശ്രീമഹാഗണപതിക്ക് പ്രധാനപ്പെട്ടദിനങ്ങളാണ്.
