ഗുരുമന്ദിരത്തിന് നേരെ ആക്രമണം

കുന്നത്തൂര്‍: ഗുരുമന്ദിരം തകര്‍ത്ത നിലയില്‍. കുന്നത്തൂര്‍ കിഴക്ക് 174-ാം എസ്എന്‍ഡിപി കരയോഗത്തിന്റെ ഗുരുമന്ദിരത്തിന് നേരെയാണ് ആക്രമണം. മുന്‍വശത്തെ ചില്ലുകള്‍ പൂര്‍ണമായി തകര്‍ന്നു. വാതിലിനും കേടുപാടുണ്ടായി. ശാസ്താംകോട്ട പുത്തൂര്‍ പ്രധാനപാതയില്‍ സ്ഥിതി ചെയ്യുന്ന ഗുരുമന്ദിരത്തിന് നേര്‍ക്ക് ഞായറാഴ്ച അര്‍ധരാത്രിയാടെയാണ് ആക്രമണമുണ്ടായതെന്ന് കരുതുന്നു. രാത്രി 11വരെ ഇവിടെ തട്ടുകടകള്‍ പ്രവര്‍ത്തിച്ചിരുന്നു. സമീപവാസികള്‍ ശബ്ദം കേട്ട് പുറത്തിറങ്ങി നോക്കിയപ്പോള്‍ ഗുരുമന്ദിരത്തിന് സമീപം നിന്നും രണ്ട് യുവാക്കള്‍ ബൈക്കില്‍ രക്ഷപ്പെടുന്നത് കണ്ടു. എറിയാനുപയോഗിച്ച കല്ലുകള്‍ സമീപത്ത് നിന്നും കണ്ടെടുത്തിട്ടുണ്ട്. ശാസ്താംകോട്ട പോലീസ് സംഭവസ്ഥലത്തെത്തി തെളിവുകള്‍ ശേഖരിച്ചു. സംഭവത്തില്‍ പ്രതിഷേധിച്ച് കുന്നത്തൂര്‍ താലൂക്ക് യൂണിയന്‍ പ്രകടനവും യോഗവും നടത്തി. വിവിധ കരയോഗങ്ങളും പ്രതിഷേധപ്രകടനങ്ങള്‍ നടത്തി.