681. കാലദാത്രീ – കാലം തരുന്നവള്. കാലം സംഭവങ്ങളുടെ തുടര്ച്ചയാണ്. പ്രപഞ്ചത്തിന്റെ ഉത്പത്തിക്കും നാശത്തിനുമിടയ്ക്കുണ്ടാകുന്ന പ്രവര്ത്തനങ്ങളുടെ ദൈര്ഘ്യവും സംഭവങ്ങള്ക്കു തമ്മിലുള്ള അകലവും കാലമാണെന്നു പറയാം. നമ്മുടെ കാലസങ്കല്പം ഓരോ പ്രവൃത്തിയുടെയും തുടക്കത്തിനും ഒടുക്കത്തിനും ഇടയ്ക്കുള്ള അകലത്തെ ആധാരമാക്കിയാണ് ഉദാഹരണത്തിന് കണ്ണടച്ചു തുറക്കാന് വേണ്ട സമയത്തെ നാം നിമിഷം എന്നുപറയുന്നു.
വിരല് ഞൊടിക്കാന് വേണ്ട സമയത്തെ ഞൊടി എന്നും സൂര്യന് ഉദിക്കുന്നതിനും അസ്തമിക്കുന്നതിനും ഇടയ്ക്കുള്ള സമയത്തെ പകല് എന്നും അസ്തമനത്തിനും ഉദയത്തിനും ഇടയ്ക്കുള്ള സമയത്തെ രാത്രി എന്നും പകലും രാത്രിയും ചേര്ന്ന കാലത്തെ ദിവസമെന്നും പറയുന്നു. ദിവസങ്ങള് ചേര്ന്ന് ആഴ്ചയും ആഴ്ചകള് ചേര്ന്ന് മാസവും മാസങ്ങള് ചേര്ന്നു വര്ഷവും…. ഇങ്ങനെ യുഗങ്ങളും യുഗങ്ങളുടെ ആവര്ത്തനവുമായി അനന്തമായി നീളുന്ന കാലം കാലാതീതയായ ദേവി നമുക്കു തന്ന സങ്കല്പമാണ്.
മനുഷ്യനു സമൂഹജീവിയായി സംഘടിക്കാനും പ്രവര്ത്തിക്കാനും പ്രവര്ത്തനത്തിനു തുടര്ച്ചയും പാരസ്പര്യവും ഉണ്ടാകാനും കാരണമായത് കാലമാണ്. മനുഷ്യനില് ഭൗതികവും ആദ്ധ്യാത്മികവും ആയ ചിന്ത ഉണര്ത്തിയതും മനുഷ്യവര്ഗ്ഗത്തിന്റെ വളര്ച്ചയ്ക്കു പ്രേരിപ്പിച്ചതും കാലമാണ്. എല്ലാം കാലംകൊണ്ടുണ്ടാകുന്ന, നിലനില്ക്കുന്ന, പരിണമിക്കുന്ന, ഇല്ലാതാകുന്നു, വീണ്ടും ഉണ്ടാകുന്നു. ജനനമരണങ്ങളുടെ ആവര്ത്തനങ്ങളിലൂടെ പൂര്ണത നേടാനും പരമാത്മാവില് വിലയിക്കാനും മനുഷ്യനു വഴിയൊരുക്കുന്ന മഹാശക്തിയായ കാലത്തിനു ജന്മം കൊടുത്തവളായും അതുതന്നു നമ്മെ അനുഗ്രഹിച്ചവളായും നാമം ദേവിയെ അവതരിപ്പിക്കുന്നു.
(തുടരും)
