വിശ്വാമിത്രമഹര്ഷി രാമലക്ഷ്മണന്മാരെയും കൊണ്ട് മിഥിലയിലേക്കു യാത്രയായി. ബ്രഹ്മജ്ഞാനികളായ മുനിമാരുടെ ഒരു വലിയ സംഘം അവരെ അനുഗമിച്ചു. സൂര്യന് അസ്തമിച്ചപ്പോള് സംഘം സമൃദ്ധിയുള്ള വനങ്ങള് കൊണ്ടു ശോഭിക്കുന്ന ഒരു നാട്ടിലെത്തിച്ചേര്ന്നു. ആ സ്ഥലം ഏതാണെന്ന് രാമന് ചോദിച്ചു. വിശ്വാമിത്രന് കൗശികവംശത്തിന്റെ ചരിത്രം അവരെ പറഞ്ഞുകേള്പ്പിച്ചു. ബ്രഹ്മാവിന്റെ പുത്രനായി വലിയ തപസ്വിയും സജ്ജനങ്ങളെ ആദരിക്കുന്നവനുമായി കൗശികന് എന്നൊരു മഹാനുണ്ടായിരുന്നു.
വിഭര്ഭരാജാവിന്റെ പുത്രിയായിരുന്നു അദ്ദേഹത്തിന്റെ പത്നി. അവര്ക്ക് കുശാംബന്, കുശനാഭന്, ധൂര്ത്തരജസ്സ്, വസു എന്നിങ്ങനെ നാലു പുത്രന്മാരുണ്ടായി. കുശന് അവരോട് രാജ്യം പരിപാലിച്ച് ധര്മ്മം നേടുവാന് പറഞ്ഞു. കുശാംബന് കൗശാംബി എന്ന നഗരം സ്ഥാപിച്ചു. കുശനാഭന് മഹോദയം എന്ന നഗരവും, ധൂര്ത്തരജസ്സ് ധര്മ്മാരണ്യം എന്ന നഗരവും വസുഗിരിവ്രജം എന്ന പട്ടണവും സ്ഥാപിച്ച് ഭരണം നടത്തി. വസുവിന്റെ രാജ്യമായ ഗിരിവ്രജത്തിലാണ് അവരിപ്പോള് വന്നുചേര്ന്നിരിക്കുന്നത്.
കുശനാഭന് നൂറു പുത്രിമാരുണ്ടായിരുന്നു. അതുല്യ സുന്ദരിമാരായിരുന്ന അവര് ഉദ്യാനത്തില് ഉല്ലസിച്ചു കഴിയുമ്പോള് വായുദേവന് അവരില് അഭിനിവേശം ജനിച്ചു. തന്റെ ഭാര്യമാരായിരിക്കാന് അവരോടപേക്ഷിച്ചു. ധര്മ്മിഷ്ഠരായ അവര് തങ്ങള് പിതാവിന്റെ സ്വത്താണെന്നും പിതാവ് തങ്ങളുടെ വിവാഹം നിശ്ചയിക്കേണ്ടതെന്നും പറഞ്ഞ് വായുദേവന്റെ അപേക്ഷ നിരസിച്ചു. കുപിതനായ വായു അവരുടെ ശരീരങ്ങളുടെയുള്ളില് പ്രവേശിച്ച് എല്ലാ അവയവങ്ങളേയും തളര്ത്തിക്കളഞ്ഞു. ഇതറിഞ്ഞ കുശനാഭന് മക്കളുടെ ധര്മ്മനിഷ്ഠയില് അഭിനന്ദിക്കുകയാണു ചെയ്തത്.
പിന്നീട് ചൂളി എന്ന ബ്രഹ്മനിഷ്ഠനായ മഹര്ഷിക്ക് സോമദ എന്ന ഗന്ധര്വ്വസ്ത്രീയില് ജനിച്ച മഹാതപസ്വിയായ ബ്രഹ്മദത്തന് കുശനാഭന് നുറൂ കന്യകമാരെയും വിവാഹം കഴിച്ചുകൊടുത്തു. പിന്നീട് കുശനാഭന് ഒരു പുത്രനുണ്ടാകാന് വേണ്ടി യജ്ഞം ചെയ്തു. അങ്ങനെ ഗാധി എന്ന പുത്രനുണ്ടായി. ആ ഗാധിയ്ക്ക് ഒരു പുത്രനും ഒരു പുത്രിയും ജനിച്ചു. ആ പുത്രനാണ് ഗാധേയന് എന്നും കൗശികന് എന്നുമൊക്കെ അറിയപ്പെടുന്ന വിശ്വാമിത്രന്. വിശ്വാമിത്രന്റെ സഹോദരിയായ സത്യവതിയെ ഋചീകനാണു വിവാഹം ചെയ്തത്.
ഭര്ത്താവിനോടൊപ്പം ഉടലോടെ സ്വര്ഗ്ഗം പ്രാപിച്ച സത്യവതി കൗശികി എന്ന നദിയായിത്തീര്ന്നു. വിശ്വാമിത്രന് ഈ നദീതീരത്താണ് ആശ്രമം സ്ഥാപിച്ചു വസിച്ചിരുന്നത്. യാഗം നടത്താന് വേണ്ടിയാണ് സിദ്ധാശ്രമവാസം സ്വീകരിച്ചത്.
… തുടരും
