താടക വധിക്കപ്പെട്ടപ്പോള് ദേവേന്ദ്രനും ദേവന്മാരും സന്തോഷിച്ച് രാമനെ അനുമോദിച്ചതായി വാല്മീകി പറയുന്നു. സന്തുഷ്ടനായ വിശ്വാമിത്രന് രാമന്റെ നെറുകയില് ചുംബിച്ചുകൊണ്ടു പറഞ്ഞു.”ഹേ ശുഭദര്ശന ഈ രാത്രി നമുക്കിവിടെ വസിക്കാം. നാളെ രാവിലെ എന്റെ ആശ്രമത്തിലേക്കുപോകാം.’
‘ അന്നുരാത്രി മുനിമാരോടൊപ്പം അവര് കാമാശ്രമത്തില് വസിച്ചു. പിറ്റേനാള് രാവിലെ കുളിയും സന്ധ്യാവന്ദനവും കഴിഞ്ഞെത്തിയ ശ്രീരാമനെ അടുത്തുവിളിച്ചിരുത്തി വിശ്വാമിത്രന് തന്റെ പക്കലുള്ള സര്വ്വവിശിഷ്ടായുധങ്ങളും ഓരോന്നായി ഉപദേശിച്ചുകൊടുത്തു.
ശത്രുസമൂഹങ്ങളെ യുദ്ധക്കളത്തില് കീഴടക്കി ജയിക്കാന് സഹായിക്കുന്ന എല്ലാ ദിവ്യാസ്ത്രങ്ങളും ദണ്ഡചക്രമെന്ന മഹത്തും ദിവ്യവുമായ ശരവും ആദ്യം നല്കി. ധര്മ്മചക്രം, കാലചക്രം, വിഷ്ണുചക്രം, അത്യുഗ്രമായ ഐന്ദ്രാസ്ത്രം, വജ്രാസ്ത്രം, ഉത്കൃഷ്ടമായ ശൈവശൂലം, ബ്രഹ്മശിരോസ്ത്രം, ഐഷികാസ്ത്രം എന്നിവ സമ്മാനിച്ചു.
എത്രയും വിശിഷ്ടമായ ബ്രഹ്മാസ്ത്രം, തേജോമയങ്ങളായ മോദകി, ശിഖരി എന്നീ രണ്ടു ഗദകള്.ധര്മ്മപാശം, കാലപാശം, വരുണാസ്ത്രം(പാശാസ്ത്രം) ഉണക്കുന്നതും തണുപ്പിക്കുന്നതുമായ അശനി എന്നീ രണ്ടസ്ത്രങ്ങള്. ശൈവമായ പൈനാകം, വൈഷ്ണവമായ നാരായണാസ്ത്രം, ആഗ്നേയാസ്ത്രം, ഇഷ്ടപ്രദമായ ശിഖരാസ്ത്രം തുടങ്ങിയവ. പ്രഥനം എന്ന വായവ്യാസ്ത്രം, ഹയശിരസ്സ്, ക്രൗഞ്ചം എന്നീ അസ്ത്രങ്ങള്. രണ്ടു വേലുകള്, അസുരന്മാര് ധരിക്കുന്ന കങ്കാളം, മുസലം, കപാലം, കങ്കണം എന്നീ ആയുധങ്ങള്. ശത്രു സൈന്യത്തെ മോഹാലസ്യപ്പെടുത്താനുള്ള മോഹനാസ്ത്രം, ഉണര്ത്താനുള്ള അസ്ത്രം, മഴ പെയ്യിക്കാനുള്ള വൃഷ്ട്യസ്ത്രം. കാമദേവന്റെ മാദനം, മോഹനം എന്നീ അസ്ത്രങ്ങള് ഇരുട്ടുണ്ടാക്കുന്ന താമസം, മനസ്സിന് ആനന്ദമുണ്ടാക്കുന്ന സൗമനം എന്നീ അസ്ത്രങ്ങള്. വിശേഷപ്പെട്ട സംവര്ത്തം, മൗസലം, സത്യം, മായാധരം എന്നീ നാലസ്ത്രങ്ങള്. ശത്രുക്കളുടെ പരാക്രമത്തെ നശിപ്പിക്കുന്ന തേജപ്രഭാസ്ത്രം, വിശ്വകര്മ്മാവിന്റെ സുദാമനം. കൂടാതെ സൗമ്യം, ശിശിരം എന്നീ അസ്ത്രങ്ങള്. സൂര്യന്റെ ദാരുണം, മൂര്ച്ചയുള്ള അമ്പുകളുള്ള മാദനാസ്ത്രം എന്നിവ.
ഇങ്ങനെ ദേവന്മാര്ക്കുപോലും പൂര്ണമായി ഗ്രഹിക്കാന് സാധിച്ചിട്ടില്ലാത്ത അസ്ത്രങ്ങളെല്ലാം വിശ്വാമിത്രന് രാമനു നല്കി. വിശ്വാമിത്രമുനി ജപിച്ചപ്പോള് അവയെല്ലാം രാമന് വരിച്ചു. ഞങ്ങള് അങ്ങയുടെ ഭൃത്യന്മാരാണെന്നും ആഗ്രഹിക്കുന്നതെല്ലാം ചെയ്തുതരുമെന്നും അവയെല്ലാം അറിയിച്ചു. രാമന് അവയൊക്കെ സ്വീകരിച്ച് തലോടിക്കൊണ്ട് നിങ്ങള് എന്റെ മനസ്സില് വസിക്കുവിന്. സ്മരിക്കുമ്പോള് വരുവിന് എന്നുപറഞ്ഞ് അവയെ അടക്കിവച്ചു. അങ്ങനെ ശ്രീരാമചന്ദ്രന് ആരാലും ഒരിക്കലും പരാജിതനാക്കാന് കഴിയപ്പെടാനാകാത്ത അജയ്യനായിത്തീര്ന്നു.
.. തുടരും
