541. ആത്മരൂപാ – ആത്മാവായി രൂപം പൂണ്ടവള്. പരബ്രഹ്മമെന്നോ പരാശക്തിയെന്നോ പറയപ്പെടുന്ന മൂകാംബികാദേവി ജീവി ശരീരങ്ങള്ക്കുള്ളില് ജീവാത്മാവായി വര്ത്തിച്ച് ശരീരങ്ങളെ പ്രവര്ത്തിപ്പിക്കുന്നു. ശരീരത്തിനുള്ളില് പ്രവര്ത്തിക്കുന്ന ദേവിയെ ജീവാത്മാവെന്നു പറയും. ജീവിയെക്കൊണ്ടു കര്മ്മങ്ങള് ചെയ്യിക്കുന്നതും കര്മ്മഫലമായ സുകൃതവും പാപവും അവയില്നിന്നുണ്ടാകുന്ന സുഖദുഃഖങ്ങളും അനുഭവിക്കുന്നതും ജീവാത്മാവാണ്. ജീവാത്മായി രൂപം പൂണ്ട മൂകാംബികയെ നാമം സ്തുതിക്കുന്നു.
542. ബ്രഹ്മരൂപാ – ബ്രഹ്മം സ്വരൂപമായവള്. സര്വാധാരവും അനാദിയും അനന്തവും നിര്വികാരവും നിര്ഗുണവുമായ ബ്രഹ്മചൈതന്യമാണ് മൂകാംബിക. സര്വലോകങ്ങളുടെയും പ്രവര്ത്തനശക്തിയായി വര്ത്തിക്കുമ്പോള് പരമാത്മാവെന്ന് ദേവിക്ക് പേര്. ആ പരമാത്മാവ് ഓരോ ജീവിയിലും ജീവാത്മാവായി വര്ത്തിക്കുന്നു.
543. സംവിന്മയീ – സംവിത്ത് സ്വരൂപമായവള്. സംവിത് എന്നപദത്തിന് പല അര്ത്ഥങ്ങളുള്ളവയില് ശുദ്ധജ്ഞാനം എന്ന അര്ത്ഥം. ഇവിടെ സ്വീകരിക്കാം. ജ്ഞാനം അറിവാണ്. മനുഷ്യരുടെ അറിവ് മനുഷ്യശരീരത്തിന്റെ പരിധികള്ക്ക് വിധേയമാണ്. മനുഷ്യന്റെ കണ്ണിനു കണ്ടറിയാന് കഴിയാത്ത വസ്തുക്കളും കേട്ടറിയാനാകാത്ത ശബ്ദങ്ങളും നിരവധി. അതുപോലെ തന്നെയാണ് മറ്റിന്ദ്രിയങ്ങളുടെയും കാര്യം. ശരീരത്തിലെ ജ്ഞാനേന്ദ്രിയങ്ങള്ക്കു സ്വീകരിക്കാന് കഴിയുന്ന രൂപം, രസം, ഗന്ധം, ശബ്ദം തുടങ്ങിയവയില്നിന്ന് വസ്തുക്കളെയും സാഹചര്യങ്ങളെയും കുറിച്ചുണ്ടാക്കുന്ന അവബോധവും അവയെ കാര്യകാരണ പരിഗണനകള്കൊണ്ടപഗ്രഥിച്ച് ഭാവന സൃഷ്ടിക്കുന്ന അറിവും ചേര്ന്നതാണു മനുഷ്യരുടെ ജ്ഞാനം.
നിര്വിഷയമായ ജ്ഞാനമാണ് സംവിത്ത്. ”ഏതൊന്നറിഞ്ഞാല് അറിയപ്പെടേണ്ടതിനെയെല്ലാം കുറിച്ച് പൂര്ണമായ അറിവു ലഭിക്കുമോ ആ അറിവ്”. അത് മഹാന്മാരായ ഋഷിമാര്ക്കോ ദേവന്മാര്ക്കോ ത്രിമൂര്ത്തികള്ക്കോ പ്രാപ്തമല്ല. ശുദ്ധ ജ്ഞാനമൂര്ത്തിയായ ദേവിക്കു മാത്രമേ ആ ജ്ഞാനമുള്ളൂ. ആ ജ്ഞാനം ദേവിരൂപമാണ്.
544. ചിദാത്മികാ – ചിത്ത് രൂപമായവള്. ചിത്ത് എന്ന പദത്തിന് വിശേഷജ്ഞാനകാരണം പരമാത്മാവ്, പരബ്രഹ്മം, ഹൃദയം, മനസ്സ് എന്നീ അര്ത്ഥങ്ങളുണ്ട്. അവയില് ഏതു സ്വീകരിച്ചാലും മൂകാംബികയുടെ രൂപമായി വ്യാഖ്യാനിക്കാം. വിശേഷ ജ്ഞാനം കൊടുത്തു ഭക്തരെ അനുഗ്രഹിക്കുന്ന മൂകാംബികാദേവി പരബ്രഹ്മവും പരമാത്മാവുമായി രൂപം സ്വീകരിച്ച് പ്രപഞ്ച പ്രവര്ത്തനത്തെ നയിക്കുന്നു. മനുഷ്യരില് മനസ്സായും ഹൃദയമായും വര്ത്തിച്ച് സമൂഹജീവിയാകാന് പ്രേരിപ്പിക്കുന്നതും മൂകാംബികാ ദേവിയാണ്.
… തുടരും
