മനസ്സിനെ സംബന്ധിച്ച പഠനവും പരിശോധനയും ഒരു യഥാര്ത്ഥ മുമുക്ഷുവിന് ഏറ്റവും ഫലദായകമായ പ്രവൃത്തിയാണ്. നിങ്ങളുടെ തെറ്റുകളും കുറ്റങ്ങളും കുറവുകളും സ്വയം മനസ്സിലാക്കി അവയെ ദുരീകരിക്കണം. ആദ്ധ്യാത്മികസാധനയുടെ ആദ്യപടി ഇതാണ്. ഇപ്പോള് നിങ്ങളുടെ ദൃഷ്ടി ബഹിര്മുഖമാണ്. അതുകൊണ്ടാണ് മറ്റുള്ളവരുടെ തെറ്റുകുറ്റങ്ങള് നിങ്ങളുടെ ദൃഷ്ടിയില് പതിയുന്നത്. ഈശ്വരദര്ശനമാണ് നിങ്ങള് അഭിലഷിക്കുന്നതെങ്കില് ആദ്യം ഈശ്വരകൃപ നേടണം. അതിലൂടെ മാത്രമേ ഈശ്വര സാക്ഷാത്കാരം സിദ്ധിക്കുകയുള്ളൂ. ഈശ്വരകൃപ ലഭിക്കുന്നതിന് ധര്മ്മപഥത്തില് സഞ്ചരിച്ച് ചിത്തശുദ്ധി സമ്പാദിക്കണം.
വിശ്വാസത്തിനു മേരുഗിരിയുടെ സുസ്ഥിരതയുണ്ടാകണം. സമസ്തലോകവും പ്രതികൂലമായി വര്ത്തിച്ചാലും വിശ്വാസത്തില് ദൃഡത വന്ന ഒരാള് അചഞ്ചലനും നിര്ഭയനുമായിരിക്കും. ജീവിതത്തിലെ ഏതു വെല്ലുവിളിയേയും നേരിടാനുള്ള തന്റേടം അവര്ക്കുണ്ടായിരിക്കും.
ജീവിതത്തില് നിങ്ങള് പ്രിയതരമെന്ന് കരുതുന്ന ഏതും സമ്പത്തോ ആരോഗ്യമോ ശക്തിയോ സാമൂഹ്യപദവിയോ നഷ്ടപ്പെട്ടാലും അത് ഒരു യഥാര്ത്ഥ നഷ്ടമല്ല.
എന്നാല് വിശ്വാസം നഷ്ടപ്പെട്ടാല് അത് ഭീമമായ ദുരന്തമായിരിക്കും. ലൗകികമായ സകല നേട്ടങ്ങളേക്കാളും വിലപ്പെട്ടതാണ് വിശ്വാസം. എവിടെ ദൃഡവിശ്വാസം പുലരുന്നുവോ, അവിടെ ഈശ്വരസാന്നിദ്ധ്യവും കാരുണ്യവും ശക്തിയും വന്നുചേരും. ശരി തെറ്റ് നന്മ തിന്മ ഇവ തിരിച്ചറിയാന് എളുപ്പം കഴിയുന്നു.
ഈശ്വരസാക്ഷാത്കാരത്തിനുവേണ്ടി നിരന്തരം പ്രാര്ത്ഥിക്കുക. അതിലേക്ക് അനുസൃതം പരിശ്രമിക്കുക. ലൗകിക മോഹങ്ങളുടെ സാഫല്യത്തിനും ഉദരപൂരണത്തിനും വേണ്ടി നിങ്ങള് എത്രമാത്രം കഷ്ടപ്പെടുന്നു. ഈശ്വരലാഭത്തിനുവേണ്ടി അതുപോലെ തീവ്രമായ അഭിലാഷത്തോടുകൂടി നിങ്ങള് പ്രയത്നിച്ചാല് ഈശ്വരന് സ്വയം പ്രകടമാവും. വിശ്വാസപൂര്വം വര്ത്തിച്ചാല് മതി.
ശ്രീ രമാദേവി
