പൂച്ചാക്കല്‍: എസ്എസ്എല്‍സി പരീക്ഷയില്‍ നൂറുശതമാനം വിജയംനേടി സര്‍ക്കാര്‍ സ്‌കൂളുകളുടെ പട്ടികയില്‍ പെരുമ്പളം ഗവ. എച്ച്എസ്എസും തേവര്‍വട്ടം ഗവ. എച്ച്എസ്എസും മാതൃകയായി. സ്വകാര്യസ്‌കൂളായ മണപ്പുറം സെന്റ് തെരെസാസ് സ്‌കൂളും നൂറുശതമാനം വിജയം നേടി. പെരുമ്പളം സ്‌കൂളില്‍ നൂറുശതമാനം വിജയം നേടിയത് പ്രത്യേക അഭിനന്ദനം അര്‍ഹിക്കുന്നതാണ്. 68 വിദ്യാര്‍ഥികളാണ് ഇവിടെ പരീക്ഷയെഴുതിയത്. പെരുമ്പളം ദ്വീപില്‍ താമസക്കാരാണ് 67 വിദ്യാര്‍ഥികളും. സാമ്പത്തികമായി പിന്നാക്കം നില്‍ക്കുന്ന മത്സ്യ-കയര്‍-കര്‍ഷകത്തൊഴിലാളികളുടെ മക്കളാണ് ഇവിടെ പഠിക്കുന്ന വിദ്യാര്‍ഥികളിലധികവും.
ദ്വീപായതിനാല്‍ ബോട്ടുയാത്രാമാര്‍ഗം മാത്രമാണിവിടെയുള്ളത്. ആറുമാസം മുന്‍പുതന്നെ സ്‌കൂള്‍ മാനേജ്‌മെന്റിന്റെ നേതൃത്വത്തില്‍ പത്താംക്ലാസില്‍ പഠിക്കുന്നവര്‍ക്കായി രാത്രിസമയങ്ങളില്‍ പ്രത്യേകം ക്ലാസ് സംഘടിപ്പിച്ചിരുന്നു. പൂച്ചാക്കല്‍ തേവര്‍വട്ടം സ്‌കൂളില്‍ 20 വിദ്യാര്‍ഥികളും പരീക്ഷയെഴുതിയിരുന്നു. കഴിഞ്ഞവര്‍ഷവും എസ്എസ്എല്‍സിക്ക് തേവര്‍വട്ടംസ്‌കൂള്‍ നൂറുശതമാനം വിജയം നേടിയിരുന്നു. ഇതോടൊപ്പം സ്വകാര്യ സ്‌കൂളായ മണപ്പുറം സെന്റ് തെരെസാസ് സ്‌കൂളിനും നൂറുശതമാനം വിജയംനേടാന്‍ കഴിഞ്ഞു. പൂച്ചാക്കല്‍ ശ്രീകണ്‌ഠേശ്വരം എസ്എന്‍എച്ച്എസ്എസും തിരുനല്ലൂര്‍ ഗവ. എച്ച്എസ്എസും 99 ശതമാനം നേടിയിട്ടുണ്ട്.
പ്രതികരിക്കാൻ ഇവിടെ എഴുതുക: