കാഞ്ഞിരപ്പള്ളി: ട്രാക്ടര്‍ കയറ്റത്തില്‍ പിന്നോട്ട് ഉരുണ്ട് ഓട്ടോറിക്ഷയുടെ മുകളിലേക്ക് മറിഞ്ഞു. ട്രാക്ടറിനടിയില്‍ പെട്ട ഓട്ടോറിക്ഷയിലെ യാത്രക്കാര്‍ നിസാര പരിക്കുകളോടെ രക്ഷപെട്ടു. ഓട്ടോയിലെ യാത്രക്കാരായ കൂവപ്പള്ളി ഇടശേരിമറ്റം രാഹുല്‍, സഹോദരിയുടെ ഒരു വയസുള്ള മകന്‍ അമൃതാനന്ദ്, ഓട്ടോ ഡ്രൈവര്‍ നാലാംമൈല്‍ കല്ലുമലയില്‍ കെ.റ്റി.സജിമോന്‍ എന്നിവര്‍ക്ക് പരിക്കേല്‍ക്കാതെ രക്ഷപ്പെട്ടു.
കാഞ്ഞിരപ്പള്ളിക്കും കുന്നുംഭാഗത്തിനുമിടയില്‍ കണ്ണാശുപത്രിക്ക് മുന്‍വശത്ത് ദേശീയപാത ലിങ്ക് റോഡിലാണ് അപകടം. ദേശീയ പാതയിലേക്ക് കയറാനായി എത്തിയ ട്രാക്ടര്‍ റോഡിലേക്ക് കയറുന്നതിന് മുന്‍പ് നിര്‍ത്തിയ ശേഷം മുന്നോട്ടെടുക്കവെ നിയന്ത്രണം നഷ്ടമായി പിന്നോട്ട് ഉരുളുകയായിരുന്നു. നിയന്ത്രണം വിട്ട ട്രാക്ടറിന്റെ ടയറുകള്‍ക്ക് മുന്‍പില്‍ നിന്നും രക്ഷപെടുന്നതിനായി ഓട്ടോ റിക്ഷയും പിന്നോട്ടെടുക്കാന്‍ ശ്രമിച്ചെങ്കിലും ട്രാക്ടര്‍ ഓട്ടോറിക്ഷക്ക് മുകളിലേക്ക് മറിഞ്ഞു. നാട്ടുകാരാണ് ഓട്ടോറിക്ഷക്കുള്ളില്‍ നിന്നും യാത്രക്കാരെ പുറത്തെടുത്തത്.
പ്രതികരിക്കാൻ ഇവിടെ എഴുതുക: